Lansamentu fatuk-dahuluk ne’e reprezenta Estadus Unidus Amérika nia kompromisu hodi tulun Timor-Leste iha ninia esforsu sira hodi moderniza ninia forsa militár no profissionaliza nia forsa sira.
Hangar ne’e, hanesan fasilidade modernu ho valór millaun $1.1, dezeñadu hodi sai mahun ba aviaun Cessna rua no sai fatin parajen ba aviaun adisionál sira seluk iha fatin estasionamentu ho luan 1,560 metrus kuadradus.
Hangar ne’e sei sai uma permanente ba aviaun Cessna 206 ne’ebé Governu Estadus Unidus oferese ona iha fulan Juñu liubá.
Aviaun ne’e ho kapasidade halo vijilánsia, hamutuk ho ró patrullamentu sira husi Austrália ne’ebé sei to’o mai iha tinan ida-ne’e nia laran, sei permite Timor-Leste hodi defende nia soberania territoriál.
“Ami iha ne’e hodi ajuda Timor-Leste hasae kapasidade patrulla marítima no defende Timor-Leste nia Zona Ekonómika Ekskluziva (ZEE),” hateten Enkarregadu Negósius Weinstock iha nia diskursu.
Partisipa mós iha eventu ne’e bainaka onradu Majór Jenerál Callahan, komandante Guarda Nasionál Rhode Island nian.
Hahú husi tinan 2020, Guarda Nasionál Rhode Island fornese ona asisténsia umanitária no kapasitasaun ba Timor-Leste, no Programa Parseria Estaduál ho Rhode Island asina tiha ona ofisialmente iha tinan kotuk iha ámbitu aniversáriu F-FDTL nian.
Majór Jenerál Callahan nia vizita ba Timor-Leste sei inklui kompromisu lubuk ida hodi hametin ligasaun no dezenvolve oportunidades ba kooperasaun entre Rhode Island no Timor-Leste iha futuru.
Estadus Unidus Amérika hamri’ik metin hamutuk ho nia parseiru sira, inklui Timor-Leste, hodi kria oportunidade, haburas amizade, no mantein Indo-Pasifiku ida ne’ebé livre no nakloke.
