Deputada bankada Khunto, Antonio Verdial hateten, koalia kona-ba asuntu sosiál ne'ebe sai hanesan preokupasaun boot ba sidadaun sira ne'ebe ho kondisaun defisiensia iha área rurál iha munisípiu sira.

Ho kondisaun defisiensia sira, deputada ne'e dehan, exemplu ida mak iha Munisipiu Ermera, Postu Administrativu Lete-foho, iha suku katrai kraik ho nia aldeia remotas tebes, hanesan Aldeia Hatudemei, Kolkoli, Mausuru-Mata no Hatugeo no Baurisu-ria.

"Iha suku ne'e ho nia aldeia remota ho kestaun distansia dok mak populasaun sira hasoru liu-liu ba defisiesia lubuk ida desde governu dahuluk to'o mai nono

governu sira nia direitu subsidiu barak mak la hetan", dehan nia, iha plenaria PN, horisehik.

Nia hatutan, defisiesia lubuk ida iha aldeia remota hirak ne'e barak la asesu ba sira-nia direitu subsídiu idosu ka ba defisiesia hosi MSSI kada fulan, tanba balun laiha kartaun eleitorál no BI, maski sira balun tinan to'o ona 17 no balun idozu ona no balun to'o mate la hetan sira-nia direitu.

"Tan ne'e bankada ne'e rekomenda nafatin ba MSSI favor ida kolobora ho MAE halo atualizasaun baze dadus administrasaun suku ida-idak para fasil, atu kria kondisaun ba defisiensia sira bele asesu ba sira-nia direitu molok sira mate", nia hato'o.

Nia levanta mos katak, iha prosesu pagamentu ba idozu sira sempre sai nafatin difikuldade ba sira ne'ebe hela iha área rurál iha munisípiu sira.

"Faktu hatudu mai ita barak tebes, tanba ne'e ha'u husu ba ministeriu relevante ba oin bele alarga pagamentu ba idozu-invalides to'o ba area rural atu nune'e ita-nia idozu sira labele sai vitima ba ita-nia sistema ne'e", tenik nia.

Iha parte seluk, Deputada PD, Shanca Margarida Tilman, hato'o mos idozu sira nia preokupasaun sira husu Governu konsidera sira nia diretu bá osan idozu ne'e bele simu kada fulan-fulan hodi bele sustenta sira nia nesesidade loro-loron.

Nia dehan, prosesu pagamentu bá diretu idozu sira nian ita hatene katak iha fulan ida-ne'e inisíu hosi inplementasaun bá planu orsamentu sira ne'ebé konstala orsamentu jerál estadu (OJE) 2024 ne'ebé aprová ona iha tinan 2023.

"Iha semana kotuk, wain-hira ami halo vizita bá maluk sira iha munisípiu manufahi postu-administrativu same nomós iha munisípiu sira seluk hanesan iha Aileu, kovalima no maliana. Ha'u hasoru maluk idozu sira hato'o sira nia preokupasaun kona-bá pagamentu idozu nian ne'ebé durante ne'e sira simu kada fulan neen ka tinan ida dalarua,"nia levanta.

Nia hatutan, Idozu  sira mós aprezenta katak, sira nia nesesidade hanesan mós ema sira seluk, hodi nune'e sira husu atu sira nia diretu bá osan idozu ne'e atu bele simu fulan-fulan hodi sustenta sira nia nesesidade loro-loron

"Iha parte seluk sira mós hato'o katak nia diretu bá idozu ne'e simu hanesan baibain kada fulan neen ka tinan ida dalarua maka bainhira maluk idozu sira ne'ebé mate molok fulan neen maka sira sei lakon sira nia diretu bá pagamentu idozu ne'e," katak nia.