Diretór Jerál Ministériu Solidariedade Sosiál no Inklusaun (MSSI), Florencio Pina Dias Gonzaga hatete, MSSI fatin atu atendimentu ba ema ho moras mental ne'ebé la'o iha estrada ninin iha kapital Dili laran, maibé Sentru São José Laklubar la sufisiente atu akumula sira.

“Ba maluk sira ne'ebe moras mental lubuk ida ita identifika iha estrada ninin, tanba sira sees a'an husi fámilia ho sira nia kondisaun moras mental, maibé ita sei esforsu nafatin kria  kondisaun ba sira,” Dehan Diretór Jerál Ministériu Solidariedade Sosiál no Inklusaun (MSSI), Florencio ba Jornalista INDEPENDENTE, iha salaun  Otél Vila-verde, Kuarta (31/01).

Florencio dehan, Sentru São José Laklubar ladun bo'ot, tanbá fatin ida deit ne'ebé Sentru Saude moras mental fasilita tratamentu ba ema ho moras mental sira no tuir informasaun sira simu ema ho moras mental limitadu.

“Bainhira hakarak ema ho moras mental, maibé akompaña husi familia, depois halo tratamentu remata ho kondisaun diak lori ba sira nia hela fatin, ha'u seidauk hetan serteja, maibé tuir informasaun hetan katak sira simu ema ho moras mental na'in 10 deit tanbá fatin limitadu,” Nia informa.

Nia subliña, kada periodu sira halo atendimentu ema ho moras mental 10 ne'e hotu, depois sira simu fali 10 kada periodu, dentru atendimentu 10 hanesan tolu diak ona no sira fo katak oportunidade parte seluk mai fali atu halo atendimentu sira saúde.

Nia afirma, instituisaun hitu hanesan São José Laklubar, Klibur Domin, ADTL, AHDMTL, RHOT no sira seluk tan mak responsabilidade ba ema ho defisiensia, maibé Sentru São José Laklubar mak tau matan ba ema ho moras mental sira.

“Ita nia tékniku sira liu-liu iha Munisipiu Dili kontinua akompaña, maibé ita iha pontus importante suporta instituisaun ne'ebé tau matan ba ema kondisaun moras mental iha dalan ninin,” Nia relata.

Nia haktuir, iha instituisaun hitu tau matan ba Ema ho defisiénsia no rejistu hetan rezesiamentu hanesan instituisaun Solidariedade Sosial, maibé ida espesifiku tau matan ba kondisaun Mental maka São José Laklubar ni’an.

“Ita hein katak asuntu moras mental sira-ne'e no tuir diskusaun katak instituisaun rasik la halo atendimentu bainhira la halo kooperasaun, entaun sira iha ne'eba halo atendimentu husi fámilia rasik,”  Nia informa.

Nia salienta, iha instituisaun balun bele atendimentu hodi fasilita ema ho moras mental atu asesu iha ne'eba halo tratamentu, maibé buat ida importante konsidera atendimentu limitadu.

“Sentru São José Laklubar ho situasaun ida-ne'ebe limitadu, maibé sira halo atendimentu iha instituisaun laran kontinua atende nafatin ba ema ho moras mental sira iha,” Kata nia.

Nia reforsa, iha situasaun ida-ne'e atu hateten kondisaun moras mental ne'e atu bele atendimentu diak, importante kooperasaun diak ho fámilia,  komunidade no instituisaun hotu tau matan ema moras mental sira.

Iha kontextu direitu umanu no ema hotu iha direitu hanesan ho garante moris seguru, MSSI husu ema hot-hotu asegura kondisaun ema ho moras mental sira iha dalan ninin.

“Liu-liu ba maluk kondisaun defisiensia no moras mental atu labele kontinua halo apresaun fiziku husi ema laiha responsabilidade, MSSI politika  iha planu asaun nasional no tuir liña ministeriais sira implementa tuir kompetensia,” Nia relata.