Diretór Jerál Ministériu Solidariedade Sosiál no Inklusaun, Florencio Pina Dias Gonzaga hatete, tuir konstituisaun Republika Demokrátiku Timor-Leste katak sidadaun hotu ho tratamentu hanesan.
“Ita hakarak kria rampa ho kondisaun diak, atu nune'e Ema ho Defisiénsia sira bele asesu ba rampa ho dignu, ha'u hanoin problema oituan ezemplu Ema ho Defisiénsia sira ba edifisiu MSSI nia kondisaun ladun di’ak,” Dehan Diretór Jerál Ministériu Solidariedade Sosiál no Inklusaun, Florencio ba Jornalista sira, iha salaun Otél Vila-verde, Kuarta (31/01).
Nia fó ezemplu sira atu sae ba andar rua to'o tolu, entaun ida-ne'e problema no difikuldade ba sira, maibé tuir dezenvolvementu no regras tenke kria kondisaun diak ba Ema ho Defisiénsia sira atu asesu fatin públiku sira.
“Politika MSSI tenke kria rampa ho kondisaun diak, depois udan no mota bo'ot tun hetan estragus rampa, maibé ita bele hateten la halo, depois halo rehabilitasaun fali rampa sira iha edifisiu MSSI nia oin,” Nia informa.
Aliende ne'e, Sentru Nasional Rehabilitasaun (CNR) Bekora fokus ba atendimentu no fasilita ba asistensia Ema ho Defisiénsia no sira-nia osan tinan 2024 MSSI apoiu orsamentu ho montante $130.914,09.
Nia dehan, osan ne'ebé aloka ba CNR atu fasilita hodi atendimentu ba Ema ho Defisiénsia sira, signifika osan ba operasional no saida deit husi CNR mak ezekuta orsamentu sira-ne’e.
Maibé kona-ba bens estar ba Ema ho Defisiénsia elisivel subsidiu iha tinan 2023 Ema ho Defisiénsia hamutuk 8,799 ho orsamentu montante $35,994 kona-ba subsidiu seguransa sosial ni’an.
Nia informa, iha tinan 2024, MSSI sei tau tan orsamentu montante rihun $4 apoiu ba Ema ho kondisaun defisiénsia husi seguransa sosial ninian. Maibé Instituisaun Solidariedade Sosial hitu iha tinan 2023 mak MSSI aloka orsamentu rihun $357, tinan 2024 depende ba proposta no sei debate ho sira, bele aumenta no bele sei hatun.
Nia fundamenta, instituisaun Solidariedade Sosial hitu klaru positvu no aprovadu hetan apoiu fundus husi MSSI nian.
