Ministru Agrikultura no Peska Joaquim Gusmão dehan, bainhira mosu insendiu iha Munisipiu Ermera, Likisa, Aileu no Bobonaro, iha 2 Outubru liu ba, Diresaun Jeral Floresta no Industria Kafé tuun ona hodi halo levantamentu dadus ba plantasaun kafé ne’ebé hetan estragus.

“Diresaun Jeral Floresta tuun iha terenu hamutuk Sekretáriu Estadu Meiu-ambiente nian halo ona assessment ba kafe sira ne’ebe ahi haan no estragu hodi identifika kafé ektare hira no huun hira, ne'ebé agora daudaun iha faze halo relatóriu kompletu,” informa Ministru Joaquim iha Palasiu Governu, Kuarta (16/10).

Provizoriamente, Ministru hatete, maske seidauk iha númeru fiksu, maibé tuir informasaun plantasaun kafé ne’ebé hetan estragus barak liu iha Munisipiu Ermera.

“Governu sei halo intervensaun imediatu maibé sei halo identifikasaun atu bele halibur informasaun sira hotu husi sekretáriu estadu meiu ambiente no mós sekretáriu estadu protesaun sivíl hodi sai relatóriu ida de’it atu nune’e apoiu ne’e ba loos ida de’it,” dehan Joaquim.

Nia hatete, Primeiru Ministru Taur Matan Ruak mós orienta ona atu entrega hotu relatoriu ba Ministériu Administrasaun Estatal hodi planeia atu halo intervensaun ba komunidade afetadu.

“Kona-ba dadus família afetadu ba kafé sei prepara hela, semana oin bele hatene ona família hira mak afetadu ba kafé no toos,” nia dehan.

Molok ne’e, Xefe Suku Urahou, Postu Administrativu Hatulia B, Munisipiu Ermera, Alberto Soares informa, plantasaun kafé 29 iha aldeia lima mak ahi haan.

“Ahi haan plantasaun kafé iha aldeia lima; aldeia Kaite-Loho, Rai-Mean, Dosmagar, Lau-Lema, no Manu-Hatu,” nia hatete.

Maske la temi plantasaun ektare hira mak ahi haan, maibé Xefe Suku ne’e hatete, husi aldeia lima ne’e, aldeia tolu; Kaite-Loho, Dosmagar, no Rai-mean mak afetadu maka’as liu.

Iha fatin ketak, Xefe Suku Ma-ubu Domingos Noronha informa, iha Suku Mau-ubu iha uma-kain 33 mak afetadu husi dezastre.

“Iha ne’e ahi haan uma haat (4) no uma 29 mak anin sobu,” informa nia.

Maske númeru uma ne’ebé afetadu la boot, maibé komunidade barak mak lakon sira-nia plantasaun kafe.

“Plantasaun kafe 29 mak ahi estraga total,” dehan nia.

Entretantu, iha suku Lisapat kuaze plantasaun kafé husi uma-kain 50 mak hetan estragus.

“… Ministériu Agrikultura presiza halo planu atu bele tau-matan ba komunidade nia plantasaun ne’ebé hetan estragus,” dehan Xefe Suku Lisapat Nelson da Cruz.