Ministru Agrikultura no Peska (MAP), Joaquim Gusmão hateten, kompañia Hong Long nia prezensa iha tasi Timor importante atu bele redús peska ilegál no fó rendimentu ba Estadu.
“Ne’e buat di’ak ida tanba sira kaer ikan iha ita nia tasi laran, no sira nia prezensa hamenus peska ilegál”, dehan nia, iha Kuartél Jerál F-FDTL, Fatuhada, horisehik.
Nia esplika, bainhira iha tasi kosta súl nian laiha atividade ruma maka sei fó oportunidade ba ema husi nasaun seluk hodi halo peska ilegál.
Joaquim dehan, prosesu ba ró kompañia nian Tribunál Munisipál Baukau (TMB) fó ona rezultadu, nune’e ró hirak ne’e ba ona halo manutensaun.
Ne’e duni, bainhira kompañia Hong Long hakarak hatama pedidu hodi peska, MAP sei kria mekanizmu ida di’ak atu kompañia kaer ikan sei halo prosesa hotu iha rai laran, nune'e merkadu lokál sira asesu hafoin bele halo esportasaun ba li'ur.
Maski nune’e, to’o oras ne’e kompañia seidauk mai hatama pedidu ba ministériu agrikultura no peska kona-ba atu kontinuasaun projetu ne’e.
Kompañia Hong Long asina kontrata ho Governu iha 2016 hodi hahú halo atividade peska, maibé liu fulan balun nia laran identifika mosu problema tanba kompañia foti mós ikan tubaraun ne’ebé protejidu.
Nune’e, iha tinan 2017, Primeiru Ministru hasai despaxu hodi hapara atividade peska no haruka ba Tribunál hodi prosesa kazu ne’e. prosesu ba kazu sei kontinua la’o. Ró kompañia nian ba halo manutensaun hafoin fó garantia iha Tribunál ho osan.
