“Foin lalais ba halo rejistu primeiru hetan 2.000 resin, no rejistu segunda faze hetan 3.800,” informa SE Mario iha nia knar fatin, Tersa (15/10).

Ho situasaun ne’e, nia dehan, governu mós hahú antisipa atu labele tan iha mudansa ba númeru okupante.

Mario hatete, governu liu husi orientasaun husi Primeiru Ministru Taur Matan Ruak prepara ona fatin tolu ba uma-kain 3.800 ne’e hodi ba hela bainhira hasai sira husi Lagoa Tasi Tolu.

Fatin dahuluk, nia dehan, iha eis Asrama 744 Bekora, fatin daruak iha Hali Dolar, Hera, no fatin datoluk iha eis Merkadu Komoro.

“Ita prepara ona fatin no aloka ona ba MOP tuir orientasaun husi Primeiru Mistru. Fatin ida iha Kompaña 744 Bekora. Ida fali iha Hali Dolar, Hera. Hali Dolar sei fahe, sorin ba terminal Minisipiu Dili nian, no sorin seluk ba konstrusaun bairro. Fatin ikus liu mak (eis) Merkadu Komoro, ne’ebé entrega ona ba MOP hodi konstrui habitasaun ba bairro,” nia hatete.

Ba etapa dahuluk, nia hatete, sei hasai okupante ne’ebé hela besik liu Lagoa ninin, hela iha foho ne’ebé liga ho Lagoa, no hela besik area estatua João Paulo II.

“Uma sira ne’ebé harii besik Lagoa maibé ema la hela ita sei sobu ne’e ba segunda parte,” informa nia.

Sesta ne’e, Hasai Uluk Okupante Foun

Governu deside ona atu iha Sesta (18/10) semana ne’e sei hasai komunidade ne’ebé foin okupa rai estadu iha area protejidu Lagoa Tasi Tolu sein oferese kompensasaun.

Hanesan públiku hatene, foin lalais ne’e komunidade balun koko harii uma iha area Lagoa Tasi Tolu ho razaun hetan autorizasaun husi Xefe Suku Komoro.

Parte governu fó ona samada ba komunidade sira atu para ona konstrui uma, maibé prosesu konstrusaun ne’e kontinua la’o. Iha uma ida mak taka ona kalen, uma rua mak hada ona bloku to’o sinta leten, no uma sira seluk foin mak hada fundasaun.

Sekretáriu Estadu Terras Propriedades Mario Ximenes informa, Sesta semana ne’e, governu sei sobu uma hirak ne’ebé foin konstrui iha area Lagoa Tasi Tolu.

Karik la konsege sobu iha semana ne’e, Mario hatete, prosesu sobu ne’e sei muda ba semana oin.

“Sesta agora sobu de’it sira-nia uma, tanba sira iha uma ona maibé sira hakarak halo aumenta uma, laiha razaun, no sira sei la hetan buat ida,” deklara Sekeratiu Estadu ne’e ba jornalista sira, Tersa (15/10).

Nia dehan, governu sei halo asaun prevensaun ba rai sira ne’ebé sei mamuk iha area Lagoa Tasi Tolu atu nune’e ema labele ba harii tan uma iha ne’eba.