“Ami hasoru-malu ko’alia enjerál de’it. Malázia hakarak koopera ho TL liu-liu hakarak dudu ita-nia prosesu dezenvolvimentu,” dehan Primeiru-Ministru Kay Rala Xanana Gusmão hatete hafoin hasoru-malu iha Palásiu Governu, sesta (31/01).
Prezensa Datuk Seri Utama Tengku Zafrul Abdul Aziz iha Palásiu Governu mós hodi sai sasin bá serimónia asinatura Memorandum of Understanding (MoU) entre kompañia Estatál Timor Gap, E.P ho kompañia Vesta alázia iha invetimentu projetu Tasi-mane.
“Ministru investimentu, komérsiu no Indústria Malázia mai iha-ne’e lori mós maluk sira ne’ebé asina tiha MoU ida ho Timor Gap. Sira hakarak investe iha ita-nia projetu tasi-mane. Ne’ebé di’ak tebtebes, ita husu bo’ot kompañia sira hosi Austrália bele loke dalan dadaun atu ita asina tiha akordu lalais nune’e maluk sira seluk mós bele mai investe,” Xefe Governu hateten.
Iha fatin hanesan, Ministru Investimentu, Komérsiu no Indústria Malázia, Datuk Seri Utama Tengku Zafrul Abdul Aziz, espresa sentimentu kontente tanba ho nia ekipa bele hasoru-malu ho Primeiru-Ministru, Kay Rala Xanana Gusmão ho Ministru sira Timor-Leste nian.
“Iha reuniaun ohin, ami sai testemuña bá empreza Timor Gap ne’ebé iha ona dispozisaun atu servisu hamutuk ho Malázia,” nia hateten.
Alende ne’e, atu kontinua komitmentu hodi apoia Timor-Leste atu sai hanesan membru plenu Organizasaun Rejionál ASEAN, tuir kompromisu ne’ebé antes ne’e Primeiru-Ministru Malázia, YAB Dato' Seri Anwar Bin Ibrahim hato’o ona.
