Prezidente Komisaun E Marcos Xavier hatete, komisaun E halo ona aprovasaun Lei lisensiamentu urbanizasaun tanba lei ne'e desde mai kedas husi VIII governu maibé la konsege no sai kaduka tiha.

"Nonu governu kontinua de'it tanba ne'e mak ami membru komisuan E ami aprova ona pareser parese iha segunda-feira ba ona iha plenária jeneralidade hotu mak ba iha espesialidade artigu pur artigu", dehan nia ba jornalista sira iha PN horisehik (30/01).

Nia informa, tanba agora ne'e komisaun E sei aprova iha em jerál para atu subemete ba meza prezidente parlamentu para oinsa hodi bele ba debate iha jeneralidade iha loron segunda feira.

"Iha rekomendasaun komisaun E oinsa para atu aselera de'it Lei ne'e para nono governu ka governu se de'it bele implementa Lei ida ne'e tanba lei ne'e importante ba ita hotu", katak nia.

Nia afirma, lei ne'e sei haforsa ba ezekutivu sira para bele halao sira nia knar ne'e tuir lei ne'ebé mak PN sei aprova.

Molok ne'e mós, Ministru Obras Públikas (MOP) Samuel Marçal hatete, tanba durante ne'e laiha lei ida para atu regula ba konstrusaun uma bobot sira ne'ebé ema ida-idak halo konforme tuir sira nia hakarak.

"Ha'u agradese tanba deputadu sira mós suporta para aselera Lei ne'e lalais, laos urjente liu, mais prioridade para ita bele rezolve ita nia problema liu-liu urbana, ita atu halo planu ordenamentu teritóriu ne'e hotu hodi haree kestaun sira ne'e hotu mais kestaun agora problema mak ita nia lei sira sei seidauk forte ne'e fó dalan para ema idak-idak halo buat hotu komoforme tuir nia hakarak", dehan nia ba jornalista sira hafoin halo audensia públiku ho komisaun E iha PN sesta (24/01).

Nia dehan, uma bobot sira ne'ebé agora dadaun ema halo konstrusaun ne'e kuaze halo temporariu de'it komforme halo tuir sira nia hakarak de'it ne'ebé dala-ruma dalan protokolu mós okupa hotu.

"Sira foti kalen tahan ida-rua taka tiha sai loja boot ida, ida-idak halo konforme nia hakarak tanba laiha lei ida para define dehan uma ne'e atu halo halnusa, iha protokolu karik nia standard ida ne'ebé, se iha aldeia nia laran karik halnusa", dehan nia.

Ho nune'e mak MOP ho komisaun E iha PN halo ona diskusaun ba lei ne'e rasik espera katak iha futuru governu bele halao tuir programa ne'ebé mak iha ba iha ordenamentu territóriu nian hodi hadia sidade Dili.

Tanba laiha lei, nia dehan, agora governu sobu ema nia uma, ema bele lori ba Tribunál ne'e so para atu rezolve de'it problema dala-ruma governu ba hatan bele lakon tan tanba laiha lei ida mak hatete.

"Tanba ne'e mak ohin (sesta) ita lori (lei) ida ne'e para fó poder ba governu para karik kontra lei ka tékniku ruma governu iha kompetensia iha poder para atu hapara, bele sobu buat sira ne'e hotu", nia hatutan.

Tanba ne'e espera katak iha tinan ida ne'e bele implementa atu iha futuru povu tomak bele komprende no lei ida mós fó kompetensia ba governu atu fó lisensiamentu konforme tuir nia hakarak.

Tanba governu mós kuandu atu fó lisensa ba ema ida atu harii uma pelumenus tekniku sira tenke tun ba terenu hodi haree karik espasu ne'e kontra lei ka lae no bele atu harii uma andar ka lae.

"Ne'ebé iha lei ne'e hakerek hotu, iha mós rekomendasaun estatutu rai ne'e hotu para ita ajusta hotu", nia subliña.

Maioria Uma bo’ot la tuir regra, iha área ida laiha valeta, serake lei ne'e mak foin tama ein vigor mak labele halo? Ne'e labele tanba hanesan ema presiza estrada ne'e nesesidade ema hotu nian entaun buat sira ne'ebé iha ona lei ne'e fó kompetensia ba governu atu sobu.

"Tanba sira halo ona antes ne'e bele mós iha indemizasaun ba sira ne'e buat seluk ida, mais agora ne'e ba oin ne'e mak ita haree para ema labele halo tan arbiru hanesan agora", nia hakotu.