"Ohin hau mai inaugura UNP unidade 9 iha Suku Kom, Postu Administrativu Lautem nian ne'ebé iha tinan kotuk suku hot-hotu konstrui uma sia 9, UNP sira ne'ebé konstrui iha tinan kotuk ne'e hamutuk unidade 5,000 ne'e to’o ohin loron atinji ona 80 %, maioria ohin loron ita inaugura ona,”dehan nia iha Suku Kom, tersa (07/03).
Governante haktuir, populasaun barak mak hakarak husu ba MAE atu marka prezensa iha sira nia hela fatin, atu nune'e bele entrega xave diretamente ba benefisiariu sira.
Tanba sira sente katak ne'e momentu ida ne'ebé oportunu ba tempu sira hanesan inaugurasaun sira, nune'e hodi bele espresa sira nia sentimentu kontente ba programa Governu nian Lori Naroman ba poulasaun sira iha Timor laran tomak.
"Hau lori oitavu Governu Konstitusional nia naran, dala ida tan espresa Governu nia satisfasaun ba implementasaun programa UNP ne’e,”tenik nia.
Ministru dehan, iha tinan 2021 Governu halo UNP hamutuk unidadae 1.254 ba benifisiariu sira.
Iha tinan 2022, Governu aloka osan hamutuk dolar amerikanu rihun $70 resin hodi halo uma hamutuk 5.000.
Ho nune’e, Ministru haktuir, antes mandatu Governu ne'e remata, sei kontinua halo uma hamutuk unidade 3,600 ho orsamentu hamutuk rihun $63 ba populasaun sira iha Timor laran tomak, husi total ne'e, sei aloka mós uma 12 mai iha Suku Kom, Lautem.
Tanba ne'e, MAE hodi oitavu Governu Konstitusional nia naran, hato'o parabens ba populasaun sira iha Suku Kom, ne’ebé implementa ona programa ida ne'e ho diak.
"UNP ne'ebé ho kuartu tolu ba uma ida, konstrui ho montante orsamentu hamutuk $17.000 no mós ba kuartu rua ho osan hamutuk $15.000," katak nia.
Iha fatin hanesan repezentante husi benefisiariu nain sia (9), Izelia Lopes ho mataben espresa ninia sentimentu kontente tanba liu husi oitavu Governu Konstitusional ne'e, bele halo uma ida ne'ebé di'ak ba sira.
“Ami la espera katak ami hetan uma ida hanesan ne'e, tanba grasa husi na’in Maromak nian ne'ebé liu husi MAE servisu hamutuk ho PNDS, ohin loron ami bele hetan uma ida ne'ebé ho dignu," dehan nia.
Entretantu, benifisiariu sira mós lahaluha hato'o obrigado wain ba oitavu Governu ne'ebé lidadera husi Primeiru Ministru, Jeneral Taur Matan Ruak.
