Prezidente Bankada Fretilin, David Dias Ximenes ‘Mandati’, preokupa  Timor Leste ukun aan tinan 20 liu ona, maibé populasaun sei kontinua  halerik ba bee-moos.

“Aldeia Camalelara, Suku Dato, Postu Administrativu Likisa, sira hakilar ba bee-moos to’o ohin loron, ita tinan 20 governasaun no tinan 20 independensia, ita-nia maluk sira ne’ebá hakilar hela de’it ba bee-moos to’o ohin loron,” dehan nia, iha Parlamentu Nasionál, Segunda (06/03).

Tanba ne’e, Mandati husu ba Ministru Asuntu Parlamentares no Komunikasaun Sosiál, Francisco Martins da Costa Pereira Jerónimo, hanesan Likisa-oan hodi bele toma konsiderasaun ba asuntu ne’e.

Iha fatin hanesan, Deputada Bankada Fretilin, Lídia Norberta dos Santos reforsa preokupasaun kona-ba problema bee-moos iha Likisa.

“Hau mós foti beibeik iha plenária ida ne’e, bee-moos iha Kapitál Likisa, komunidade sira hola bee iha tanki, ho nune’e ami husu atu Bee Timor Leste haree didi’ak,” dehan nia.

Tanba, nia dehan, funsionáriu BTL,EP tula ekipamentus ho karreta halai iha Likisa laran, maibé la halo manutensaun ba kanu bee nian hodi fasilita bee-moos ba populasaun sira.

“To’o ikus funsionariu antigu sira Servisu Água Saneamentu ne’e mak halo fali manutensaun tanki ne’ebé foer tebtebes,” nia informa.

Iha fatin ketak, Xefe Suku Maubara Lisa, Narzicio da Costa informa, komunidade sira husi aldeia Daru-lema, Kaikelilau, Nunu-lete, Lisa-lara no Gugleur ho total populasaun na’in 2.567 no uma-kain 500, durante ne’e hasoru problema bee-moos, eletrisidade no estrada.

Nia dehan, iha aldeia lima ne’e kanalizasaun bee-moos aat ona, maibé to’o ohin seidauk hadia.

Aleinde ne’e, nia hatutan, problema estrada mós difikulta komunidade sira atu lori produtu ba merkadu, liu-liu iha tempu udan.

Ba eletrisidade, nia dehan, iha uma-kain 11 mak to’o ohin seidauk asesu liña eletrisidade.

Tan ne’e, nu’udar autoridade, nia husu ba ministériu kompetente hodi buka solusaun ba problema hirak ne’e.