Diretór Relasaun Externa no Komunikasaun iha Autoridade Protesaun Sivil, Anacleto Caitano hatete, tipo husi dezatre naturais ne’ebé akontese iha tolu mak hanesan, anin boot, inundasaun no rai halai ne'ebé akontese iha Munisiupiu 10 inklui Rejiaun Administrativa Espesial Oekusi Ambeno (RAEOA).
Munisipiu sira ne'ebé akontese anin sobu uma mak Ainaru uma ida mak hetan estragus, Baukau iha uma ida, Kovalima iha uma rua, Likisa iha uma hitu, Lautem iha uma ualu, Bobonaro iha uma hitu no RAEOA iha uma sia.
Aleinde, rai halai ne'ebé estragus komunidade sira nia uma, iha Munisipiu Bobonaru uma neen no RAEOA ida.
Enkuantu, inundasaun ne'ebé akontese iha Munisipiu Bobonaru rezulta uma 29 hetan estragus no RAEOA uma 90 no mós iha Dili ahin han uma ida.
“Ema na’in haat ne'ebé lakon vida kompostu husi Munisipiu Ermera iha na’in ida mota, RAEOA mota lori ema na’in ida, Ermera labarik ida mout iha Lagoa no Vikeke Lafaek tata mate ema ida,”dehan nia iha konferensia imprensa iha salaun APC, segunda (06/03).
Nia dehan, dezastre naturais ne'ebé APS rejistu iha semana ida nia laran, vítima sira hetan ona apoiu emerjensia maibé iha Munisipiu haat mak seidauk.
Munisipiu haat ne'ebé seidauk hetan apoiu emergensia mak Aileu, Ermera, Lautem no RAEOA.
"Sira balun seidauk hetan apoiu tanba dalaruma iha área ne'ebé kolega sira susar atu asesu no mós iha tan buat balun hanesan transporte no rekursu mak la to'o," dehan nia.
Ho nune’e, nia haktuir, ba apoiu rekoperasaun nian ekipa APS sei tun ba halo reverifikasaun kontinua halo levantamentu dadus hodi hatene uma hatene uma hira mak tama iha kategori rekoperasaun.
