Prezidente Parlamentu Nasionál, Aniceto Longuinhos Guterres Lopes hateten, loron feto mundiál meza Parlamentu Nasionál hakarak fó votu parabéns ba feto no labarik feto iha mundu.

“Ba loron mundiál feto, sira hotu feto forte, mundu forte, mundu ne'ebé iha pás no mundu ne'ebé hakmatek, dezeja no dala ida tán parabéns feto no labarik feto sira Timor-Leste tomak, em partikular Deputadas, funsionaria iha Parlamentu Nasionál,” dehan nia, iha Parlamentu Nasionál, horisehik.

Iha fatin hanesan, Deputada Bankada CNRT, Maria Barreto, lori Bankada CNRT hakarak hato'o parabéns feto Timor-Leste.

“Espera katak loron ida-ne'e hanesan ida-ne'ebé feto sira nia luta hodi atinji pás no igualidade iha sira-nia moris loroloron,” dehan nia

Deputada Barreto dehan, feto maluk sira hotu, sai nafatin feto ida-ne'ebé matenek, forsa no inspira, familia, komunidade, nasaun no mundu tomak.

“Dala ida tan ami Bankada CNRT hato'o parabéns feto sira hotu tantu ferik, joven no labarik sira hotu iha Timor-Leste,” nia informa.

Prezidente Bankada Frente Mudansa, Isabel Ximenes fó parabens no kongratulasaun ba feto tomak iha mundu prinsipalmente feto no labarik feto Timor-Leste.

“Aban ita sei selebra ofisialmente loron feto mundial nian, tanba ne’e parabens ba feto no labarik sira hotu iha Timor-Leste,” tenik nia

Deputada Bankada Fretilin, Helena Martins Belo, parabéns feto Timor-Leste tomak ne'ebé mak ohin selebra loron nasionál feto.