Haree husi ókulu analiza polítika nian, Valentim hateten, ema ida atu sai presidente repúblika liu husi prosesu naruk. Tenke investe makaas iha prosesu dezenvolvimentu nasionál hahú investe husi enerjia no kapasidade mak foin bele sai lider, la'ós tuur-tuur hakfodak hakarak lidera nasaun ida.

Hanesan mós ho Lú-Olo, liu prosesu naruk tanba nia hanesan eis-militár husi ai-laran, kuandu funu hotu nia mai halo konseitu ba lejizlasaun sira hanesan konstituisaun no asume presidente parlamentu nasionál to’o hasai títulu iha universitáriu.

Tuir nia, ne’e hanesan investimentu boot ne'ebé halo ba konstrusaun Estadu Timor-Leste. Ne’e duni, bele mellora esperiénsia barak atu lidera nasaun ne’e ba oin.

Iha parte seluk, reprezentante povu iha Parlamentu Nasional husi bankada FRETILIN Felisberto Monteiro Guterres afirma, Francisco Guterres Lu-Olo ne’ebé maka eleitu ba Prezidente Republika, nee planiadu ona iha tinan 1974-1975.

“Hanesan permeiru kuandu Prezidente Republika ita nia Maun Boot Xanana, FRETILIN hotu hotu apoia, tuir fali ita nia diplomata Ramos Horta sai ba Prezidente, tanba tuir estrutura politika ne’ebé komandu Superemiu da luta ninia, depois ba fali iha Taur Matan Ruak, tanba nee planiadu kompletu tiha ona, nee lasignifika maun Xanana iha maka Lu-Olo manan lae, maibe tempu duni ona, iha estrutura neebe estabelse husi 1974 mai to iha 2017 hakarak ka lakoi jata nee FRETILIN nian,”dehan deputadu Felisberto.