Tanba ne’e Komandante F-FDTL Lere husu ba rezistensia nia ema liuliu Brigada Negra no grupu Reis Kadalak atu labele kaer politiku fahe lider sira.

“Ha’u husu liu liu ba ema veteranus sira, rezistensia nia ema lalika kaer politika fahe ema (lider), ne’e ha’u koalia kona ba Brigada Negra, Reis Kadalak sira. Primeiru deklarasaun krimi nian tanba sira deklara, prontu para ran fakar ne’e, ran fakar ba saida? Ida ne’e deklarasaun krimi. Mais tanba deit katuas Xanana, Katuas Taur no katuas Lú Olo iha deverjensia uitoan mak, imi prontu fakar ran. Ne’e mak ha’u hatete bebeik, kuandu ita nia maun sira nia problema di’ak liu ita lalika hatama ita nia kanuru tohar. Hanesan uluk hau hatete sira hatene halo problema sira mak tenke sai solusaun ba sira nia problema nian.”Lere deklara ida ne’e, hafoin hasoru malu ho Presidente Repúblika, Kuarta (27/5), iha Palacio Preesidensial, Bairo-Pite, Dili.

“Impase politika ne’ebé agora ita hare ninia hun ne’e mai husi ne’ebe, ema tenke buka buka hatene nia hun, mais atravez media fo sai sempre fo sai maun Xanana nia naran, maun Taur no maun Lú Olo nia naran. Sira na’in tolu ne’e se? para Reis Kadalak, Nuno Brigada Negra dehan katak ‘ami hamutuk ho Xanana too iha ne’ebe deit’. Mais nusa mak o la hamutuk Taur no labele hamutuk ho Lú Olo. Ne’e imi komesa fahe, Xanana se Taur Se Lú Olo se? no labele halo deklarasaun ida dehan, ‘AMI PRONTU FAKAR RAN. BOSOK TEN, ami ne’e mak uluk hakarak mate iha kombate, mate ne’e mate ona, mais agora labele halo deklarasaun tun sa’e hodi fahe fali ita nia lider sira ne’e. ne’e deklarasaun ida KRIMI nian,”Lere apela.

Nia apela ba ema resistensia sira atu kontinua hamutuk lori lider sira na’in lima (Alkatiri, Ramos Horta, Xanana, Taur Matan Ruak no Lú Olo) tur hamutuk ba dialogu.

“O labele ba liu husi ida neba depois hases fali ida seluk. Ne’e ha’u hanoin katak labele halo ida, nune’e ema seluk aproveita fali ita, organijasaun sira ne’e mesak rezistensia nia ema de’it. Tanba ne’e apela nafatin ba maluk rezistensia atu kuidadu halo deklarasaun nune’e halo todan tan problema.”