Periodu extensaun ba Estadu Emerjénsia datoluk nian, sei hahú kinta-Feira 28 Maiu 2020, oras 00:00 to’o Sesta-Feira, 26 Junu 2020, Óras 23:59, durante fulan ida nia laran.

Prezidente Parlamentu Nasionál, Aniceto Guterres hatete,  Parlamentu Nasionál aprova  ona  pedidu extensaun estadu Emerjénsia nian.

“Ha’u hanesan lori Parlamentu nasionál husu Primeiru Ministru ho nia membru Governu tomak implementa didiak, maibé nafatin servisu maka’as responde povu nia moris, atu nune’e povu labele hamlaha iha Estadu Emerjénsia,”dehan Aniceto, Kuarta (27/05).

Vise-Prezidente Bankada FRETILIN, Francisco Miranda Branco hateten, Bankada FRETILIN haree rai barak no nasaun vizinu sira (Indonesia) kazu pozitivu aumenta ba beibeik, ho kontamisaun iha sira nia komunidade

“Ita partilla hela fronteira terrestre mos, hasoru hela batalha boot ho kazu ne’ebé aumenta makas lor-loron. Husi expriensia mos ne’ebé ita haree iha media relasiona ho rai barak ne’ebé manan primeira batalha, maibe agora komesa hasoru fali batalha foun kontra virus ida ne’e, fó hanoin ita katak ita presiza tau nafatin atensaun ba medidas prevensaun iha ita nia rai doben Timor-Leste,” dehan nia.

Prezidente Bankada Partidu Demokratiku, Deputadu Antonio da Concecão heteten, Extensaun Estadu Emerjénsia ba datolu, Bankada Partidu demokratiku konkorda katak Saude Publika nu’udar kestaun de interese nasionál.

“Maibé, medidas ne’ebé Governu agora hola sei hamosu tan konsekuensias ne’ebé sei hatodan estadu no mós hatodan ita nia povu. Hatodan Estadu basa ekonomia Timor-Leste nian agravado iha tinan tolu nia laran ona no agora ita bele dehan besik dadaun ba agonia,”dehan nia.

Autorizasaun Parlamentu Nasionál ba extensaun Estadu Emerjénsia ba periodu datolu ne’e sei haruka ba Presidente Republika hodi dekreta.