Nia dehan, iha duni suspeitu ida ba kazu COVID-19, maibé seidauk konfirmadu. Bazeia ba protokolu jestaun kliníku ba Moras Coronavirus-2019 (COVID-19) ne’ebé konkorda entre Ministériu Saúde (MdS) no OMS, individu refere iha ona izolamentu dezde oras ne’ebé nia ba fasilidade saúde.
Individu ne’e kontinua iha kondisaun estavel no hetan monitorizasaun besik husi Ministériu Saúde. Amostra husi individu ne’e rekolla ona no manda ona ba Austrália hodi halo teste ba konfirmasaun.
“Deteta ona kazu konfirmadu por volta rihun atus ida, no akontese iha nasaun atus ida resin. Husi kazu sira ne’e, rejista rihun ualu nulu resin iha Repúblika Populár Xina no rihun rua nulu resin iha nasaun seluk. Husi númeru sira ne’e ema kuaze rihun tolu mate iha Xina no atus haat husi nasaun sira seluk. Nune’e taxa mortalidade ba COVID-19 3.4 pursentu,”haktuir reprejentante OMS ne’e, bainhira halo sorumutu ho Xefe Estadu, segunda ohin, iha palacio Presidensiál, Aitarak Laran, Dili.
Mezmu Timor-Leste seidauk iha kazu konfirmadu peprezentante ONU no OMS ne’e husu atu foti medida prevensaun ida adekuadu. Haktuir katak métodu kontrolu ne’ebé Xina halo ne’e di’ak tebes no ida ne’e aplikavel ba nasaun seluk inklui Timor-Leste.
Métodu sira ne’e maka hanesan: Servisu hamutuk hodi deteta kazu, ba sentru saúde sira bainhira moras, buka tuir ema sira ne’ebé besik ba ema moras, treinamentu pesoál saúde no prepara fatin Karantina.
Maneira prevensaun seluk ne'ebé konsidera importante maka hanesan; fahe informasaun ne'ebé lolós , evita fahe no konsumu informasaun falsa, abitua ho istillu vida saudável, hanesan fase liman bebeik, taka ibun ho tixu bainhira fani, tau maskra bainhira moras, no hemu bee no deskansa barak.
Rona tiha informasaun sira ne’e, Xefe Estadu hato’o nia apresiasaun ba ONU, OMS no MdS no ba entidade tomak ne’ebé halo ona esforsu atu prevene COVID-19. Tuir Lú Olo prevensaun ba COVID-19, nee tenke sai responsabilidade entidade hotu-hotu nian. Prezidente Lú Olo iha biban ne’e hato’o nia prontidaun atu hato’o Mensájen Estadu ida ba Povu Timor-Leste tomak kona-ba COVID-19.
Governu Timor-Leste foti ona medida sira hanesan ; Servisu hamutuk ho OMS kontinua atualiza situasaun kona ba COVID-19 iha Timor-Leste no mós globál, Harii ona ekipa traballu interministeriál no inter-ajénsia hodi tau matan ba COVID-19, no Prepara fatin izolamentu ne'ebé adekuadu. (komunikadu PR)
