Molok ne'e, lider partidu CNRT ho nia aliadu sira, PD, KHUNTO, PUDD, UDT/FM, hakat ba palasiu prezidensial hodi halo enkontru ho PR Lu Olo ho objetivu atu forma governu foun, maibé PR Lu Olo husu sira atu priense rekezitus balun.
Ho nune'e, iha loron hirak liu ba, CNRT ho nia aliadu sira ida-idak hahú realiza konferensia estraordinariu hodi deside sira-nia pozisaun.
Portavoz koligasaun, Anotónio da Conceiҫão "Kalohan" hatete, bazeia ba rekezitus ne’ebé PR Lu Olo husu, partidu CNRT, KHUNTO, PUDD, UDT, FM prienxe hotu ona liu husi konferensia nasionál estra-ordinariu.
“Orsida (horseik) lokraik, hanesan portavoz ha'u sei hasoru malu ho prezidente koligasaun, depois haree entermus karta hodi haruka ba prezidente repúblika, orsida prontu, ohin bele hatan,” dehan Kalohan iha PN horisehik.
Bainhira PR Lu Olo la simu, nia dehan, signifika PR Lu Olo fó alternativu seluk ona, tanba koligasaun foun nia esforu atu salva nasaun mak halo daudauk ne'e.
“Ita hein de'it, mai ami laiha tán buat seluk ne’ebé mak ami presiza atu halo, mak ida agora dadauk ne’e prezidente repúblika simu koligasaun foun ne’e ka la simu,” dehan nia.
Tenke Demite Ona PM Taur
Jurista Manuel Tilman la konkorda ho PR Lu Olo ne'ebé haruka koligasaun foun atu priense rekezitus.
Tuir nia, koligasaun foun la presiza atu halo tuir buat ne'ebé PR Lu Olo husu maibé halo tuir de'it rejimentu PN.
Tilman dehan, koligasaun foun bele hili Primeiru Ministru foun no aprezenta ba PR Lu Olo hodi nomeia.
"Prezidente (Repúblika) laiha kompetensia atu koligasaun sira halo fali konferensia tanba de'it la prense rekejitus. Agora saida mak Prezidente Repúblika tenke halo, Prezidente tenke dekreta demisaun Primeiru Ministru Taur nian tuir artigu 112 númeru 2 atu nune’e governu foun ne’e iha fatin par atu tama ka ukun," dehan Tilman.
