Ministru Agrikultura, Pekuária, Peska no Floresta (MAPPF),  Marcos da Cruz hateten, ohin MAPPF ho Diretór kompañia Minarta Dutahutama,  Usman Lameki asina kontratu hodi halo konstrusaun irregasaun Maliana II, nune’e bele hasa’e agrikultor sira nia produsaun.

"Ami  asina ona kontratu ida ne’e ho intensaun atu apoiu fornesimentu bee ho sufisiente ba komunidade agrikultór sira iha Maliana II hodi bele servisu iha natar hodi hasa’e produsaun iha futuru," informa Marcus da Cruz ba Jornalista sira iha edifisiu MAPPF, (28/10).

Nia dehan, konstrusaun irrigasaun Maliana II ne’e sei kobre area hamutuk Hektares 1.401 husi totál area ne’e iha kuaze ektare 300 ba iha ita nia viziñu Indonézia. Tanba husi Indonézia nian ne’e, sira iha kanál ne’ebá bainhira halo barazen sei konek direta ba sira nia kanál

Parte Timor-Leste nian kuaze iha ektare 1.401 ektares sei halo mós kanál prinsipál kuaze 2.9 kilometru ho orsamentu ba konstruaun tokon  $9.8 no osan ba konsultan hamutuk rihun $800 resin, nune'e durasaun kontrantu ba konstrusaun ne’e hamutuk kuaze fulan 30 ka bele dehan tinan rua resin.

MAPPF Sei  esforsu ne’ebé governasaun da-sia liu husi Ministériu Agrikultura realiza daudaun ne’e, atu aumenta produsaun agrikultura laoos de’it ba haree maibé ba batar, modo no animál sira tanba bee importante tebes ba buat sira ne’ebé moris, inklui ba ema, ba ai-horis, animál no mós ba ikan.

Bainhira ita halo konstrusaun sira ne’e hotu bee sei tama barak mai natar sira no ita sei buka halo modifikasaun oituan atu ita bele moderniza ita nia sistema agrikultura.

Ne’ebé durante fulan 30 ne’e ita espera sira bele halo konstrusaun ne’e remata, maibé tenke ho kualidade no kumpre durasaun tempu ne’ebé iha.

Tuir nia katak  MAPPF sei reforsa nafatin prosesu kontrusaun ba irrigasaun sira iha Munisípiu sira, tanba produsaun iha rai laran sei ki’ik, politikamente governu sei kontinua halo nafatin importansaun ai-han husi rai seluk. Tanba Timor-Leste nasaun ki’ik ninia setór agrikultura la sufisiente atu responde nesesidade povu nian.

Iha fatin hanesan Ministru Planeamentu Investimentu no Estratejiku (MPIE) Gastão Sousa  apresia Ministériu agrikultura Pekuária, Peska no Floresta (MAPPF)  tanba úniku ministru ne’ebé ninia implementasaun projetu mak tuir duni regra fundus infraestrutura nia.

“Ha’u hakarak dehan sei iha projetu rua seluk husi MAPPF nian mak depois asina tiha kontratu Maliana II ne’e, iha tempu besik sei kontinua asina tan projetu rua seluk," Nia reforsa

 Tanba Ministériu bele halo kooperasaun servisu di’ak ho Fundus Infraestrutura no CNA tan ne’e husu ba ministru tenke hatudu nafatin ninia vontade atu servisu hodi bele aselera projetu sira ne’e ho di’ak liu tan.

Ministru Gastão  husu ba dirijente sira iha Ministériu agrikultura ne’e atu ajuda Ministru hodi bele lori prosesu sira ne’e la’o di’ak liu tan, apresia ba kontratór no konslutór sira tanba bele hetan ona konfiansa husi governu Timor-Leste hodi realiza asina kontratu ida ne’e ho Ministériu agrikultura.

Ho  ida ne’e hanesan apresiasaun boot ida no ba futuru kuandu konstrusaun n’e la’o di’ak konfiansa sei mosu liu tan no kompañia sei hetan naran di’ak iha nasaun Timor-Leste no mós iha Indonézia rasik.

Entretantu Diretór Kompañia Minarta Dutahutama, Eng. Usman Lameko agradese tebes tanba bele realiza ona asina kontratu ba konstrusaun irrigasaun Malaiana II ho governu Timor-Leste liu husi Ministru Agrikultura.  Hanesan buat ne’ebé hateten ona iha kontratu nia laran katak, projetu ne’e tenke realiza ho kualidade, tenke remata ho tempu no pagamentu tenke tuir tempu.

“Nu’udar kontratór ami sei servisu ho responsabilidade atu garante kualidade tanba ne’e ami sei esforsu atu bele finaliza konstrusaun ba projetu irrigasaun ne’e atu tui nia tempu no tuir area tarjetu ne’ebé termina ona hodi nune’e bele apoiu agrikultór sira atu servisu niha ina natar atu tinan oin bele iha ona koleta hare ho kuantidade boot,” Nia hakotuk