Deklarasaun husi SEI Elvina ne’e relasiona ho aktu husi mane ida ho inisial JRX (34) ne’ebé oho nia feen, BS (34), ne’ebé ho kondisaun isin-rua fulan ualu, iha area Nu’u Laran, aldeia Fatuk Francisco, Suku Bekora, Postu Administrativu Kristu Rei, Munisipiu Dili, iha Domingu (20/10).
"Sekretáriu Estadu Igualidade triste no lamenta tebes ba aktus no asidente sira ne'ebé akontese daudaun no mós ba kazu sira ne'ebé mak laen ka parseiru rasik hakotu nia feen (nia vida) no mós oan iha kabun laran. Ida ne'e mak realidade moruk ba feto sira hasoru iha vida moris lorloron," dehan Elvina ba jornalista sira hafoin partipa diskusaun kona ba Violensia Bazeia ba Jeneru, iha City 8, Segunda (28/10).
Dala-barak, nia dehan, feto sira hasoru violénsia fiziku no kualker tipu violénsia ne'ebé laen sira halo no feto balun tenke lakon vida iha sira-nia parseiru rasik nian liman.
"Balun tenke mate iha sira-nia parseiru ka laen ka (ema ne’ebé) sira konfia, ne'ebé mak sira hadomi nia liman. Ita bele dehan hahalok ne'ebé mak kruel tebes ne'ebé mak laen halo ba sira-nia feen."
Kontinua advokasia hasa’e mane nia konsensia
Sekretáriu Estadu Igualidade nafatin halo advokasia hodi hasa'e konsénsia mane sira nian oinsá atu hado'ok an husi kualker violénsia hasoru feto no labarik feto sira.
"Sekretáriu Estadu Igualidade servisu maka’as, nafatin kontínua halo advokasia, halo mudansa ka hasa'e konsiénsia mane maluk ka parseiru sira, par hodi hado'ok an husi kualker tipu violénsia hasoru feto no labarik feto sira. Ida ne'e mandatu ne'ebé mak fó hela ba ami, Sekretáriu Estadu Igualidade, liu-liu ami-nia servisu maka’as iha advokasia, ida ne'e ami sei nafatin servisu," dehan nia.
Relasiona ho númeru kazu 215 ne'ebé Fokupers rejista, nia dehan, iha buat rua mak presiza haree. Dahuluk, númeru ne’e hatudu iha feto lubuk ida mak barani atu hamriik hodi defende sira-nia an hodi hetan justisa, no ba daruak, númeru ne’e reprezenta feto sira-nia vuniravelidade.
“Sira mak reprezenta feto nia sofrimentu, reprezenta feto sira-nia problema ne'ebé mak hasoru hela,” dehan nia.
Ba kestaun violensia hasoru feto, nia dehan, SEI halo hela koordenasaun ho liñas ministérias, liu-liu Ministériu Justisa, atu bele haree oinsá atu asegura asesu ba justisa ba feto maluk sira bainhira hetan problema.
“Se nia sai vitima ona, nia tenke hetan asistensia no hetan justisa. Ida ne'e mak hanoin presiza atu halo liu husi rede referál ne'ebé mak iha.”
Durante ne’e, tuir nia, dala-ruma sosiedade seidauk komprende hodi kontinua duun feto sira iha prosesu tomak. Ezemplu, kazu so'e bebé, sempre akontese ka sosiedade maioria nafatin duun feto mak sala.
Atu bele hamosu konsensia, nia dehan, SEI nafatin servisu, la’os de’it SEI mesak maibé mós liñas Ministérias sira, Sosiedade Sivil, inklui média.
"Média mós tenke sensivel bainhira halo notisia ruma, la'ós iha kazu ruma ne'ebé mak akontese halo títulu notisia ne'ebé mak menyudutkan feto iha prosesu ne'e ka menyudutkan mane ne'ebé mak sai vitima ba iha prosesu ne'e."
“Média sira tenke habelar Informasaun atu nune'e bele hasa'e ema-nia konsénsia kona-ba violénsia bazeia ba jéneru, tanba liu husi publikasaun husi média sira mak sei muda ema-nia mentalidade”.
Molok ne’e, Diretóra Ezekutiva Fokupers, Domingas Afonso Amaral informa, hahú husi Janeiru to’o Outubru 2024, Fokupers rejistu kazu violénsia bazeia ba jéneru hatumutuk 215.
Husi kazu hirak en’e, nia dehan, grave liu akontese iha fulan Outubru ne’e.
"Grave liu iha fulan Outubru 2024, violénsia hasoru feto no labarik feto ho idade ménor ne'ebé mak hetan violénsia sexuál, presaun psikolojia, agresaun fízika hodi uza instrumentu kroat to'o halakon sira-nia vida," informa Diretóra ne’e, Kinta (24/10).
