Reprezentante UNFPA iha Timor-Leste, Bruce Campbell hatete, UNFPA iha komprimisu atu mellora di'ak liu tan saúde reprodutiva no kapasita família sira iha mundu, liu-liu iha Timor-Leste.
Nia hatutan, ema tenke hamutuk atu nune'e bele defende importánsia espasu entre oan tinan tolu hodi promove intervalu.
"Espasu entre oan tinan 3 la’os de’it kestaun saúde, maibé hanesan direitu fundamentál ida, dalan ba família no komunidade atu saúdavel liu," dehan Bruce iha lansamentu ba kampaña refere iha Ponte B.J. Habibie, Sesta (25/10).
Bainhira família sira konsege halo espasu entre oan iha tinan tolu mak sira sei hetan benefisisu barak no redus mortalidade inan no bebé.
"Espasu ne’e fó tempu ba inan atu rekupera fizikamente no depois de partu mellora saúde ho bem-estar em jerál, ho evidénsia sira konsistentemente hatudu katak espasu oan ne’ebé adekuadu entre oan bele redus mortalidade materna no bebé foin moris," nia dehan.
Nia afirma, bebé sira ne’ebé moris ho espasu ida ho seguru mak posibilidade bele hetan saúdavel, oinsá atu mellora liu tan sira-nia nutrisaun no alkansa sira-nia objetivu edukasaun ne’ebé di’ak liu.
"Prioritiza prátika simples ho impaktu boot ne’e sei mellora signifikativamente kualidade moris ba inan, oan ho komunidade tomak."
Tuir peskiza sira hatudu katak se inan sira hein to’o tinan rua atu sira bele ko’us fali, mortalidade ba labarik menus husi tinan 5 sei redus ba 13%, no se sira hein tan to’o tinan tolu, redusaun ne’e sei aumenta ba 25%.
“Intervalu hotu-hotu ba kada gravidez bele alkansa to’o tinan tolu mak sei iha redusaun labarik mate to’o 1,8 miliaun kada tinan," nia informa.
Atu atinze ida ne’e, nia dehan, ema hotu tenke garante katak bele asesu servisu saúde reprodutiva komprensivu, inklui akonsellamentu, edukasaun no benefisiu espasu seguru entre oan.
"Ita hotu tenke kria ambiente ida iha ne’ebé kazal sira sente konfiante atu halo desizaun ne’ebe informadu tuir sira-nia nesesidade no aspirasaun," nia dehan.
Nia dehan, UNFPA ho Ajénsia ONU seluk komprometidu atu apoiu nafatin Ministériu Saúde hodi garante katak inan isin-rua hotu-hotu dezeja partu iha seguru no joven sira-nia dejeizu atendidu.
Iha fatin hanesan, Embaixadór Japaun mai Timor-Leste, Tetsuya Kimura hatete, Japaun kontente tebes bele hola parte iha lansamentu ida ne'e, liu-liu ba setór saúde no hakarak mós fó apresiasaun ba governu Timor-Leste ne’ebé fó prioridade ba setor saude.
Iha ambitu dezevolvimentu nasionál, nia dehan, entre inisiativa oioin hodi hadia saúde maternidade infatil nian mak importante liu.
Nia dehan, iha tinan kotuk, iha enkontru ida ho Ministériu Saúde, Japaun reafirma nia komprimisiu atu avansa koletivamente iha saúde no direitu saúde reprodutivu ne'ebé mak komprensiva.
"Ha'u fiar katak importante ba ema hotu-hotu, liu-liu inan no labarik feto sira, atu iha asesu ba informasaun ne'ebé loos no ikus nesesaria atu nune'e ema hotu-hotu bele moris saúdavel no gradifikante."
Iha fatin hnaesan, Vise Ministru Fortalesimentu Instituisionál Saúde, José dos Reis Mango lori governu Timor-Leste nian naran hato'o agradesimentu ba parseiru sira, liu-liu UNFPA no Governu Japaun, ne'ebé mak nafatin apoiu governu Timor-Leste.
