Embaixadór Japaun mai Timor-Leste, Tetsuya Kimura informa, nia parte organiza Festival Japaun ne’e ho objetivu atu hametin liu tan kooperasaun no relasaun, no introdus kultura entre Timor-Leste ho Japaun.

"Ha'u kontente tebes hodi organiza festival Japaun ida ne'e. Objetivu husi festival ida ne'e atu hametin liu tan kooperasaun no relasaun entre pais rua nian no mós atu introduz ka promove liu tan kultura entre pais rua ne’e," dehan Kimura hafoin abertura Festival Japaun 2024, iha Jinaziu GMT, Dili, Sabadu (26/10).

Iha festival Japaun 2024 ne’e, nia dehan, nia parte halo promosaun kona-ba kultura Japaun no budo ka arte-marsiais Japaun nian hanesan judo, kempo, Ai-Kido no karate.

"Liu husi eventu ida ne’e, ami hakarak atu promove liu tan budo tradisional Japaun nian, atu nune'e Timor-oan barak liu tan ne'ebé mak koñese espiritu husi budo tradisional Japaun nian, no mós bele atrai Timor-oan barak liu tan ne'ebé mak hakarak pratika budo tradisional Japones sira nian."

Iha eventu ne’e introduz mós kultura Japaun sira seluk hanesan Origami ka arte hikar surat-tahan no kaligrafi.

“Ida ne’e kaligrafia japones ne'ebé mak ita bele hakerek ita-nia naran no liafuan badak ruma ne'ebé ita hakerek uza kaligrafia japones nian.

Iha mós Yukata ka roupa tradisional Japaun nian ne'ebé partisipante sira bele koko hatais hodi hasai fotografia.

"Ha'u sente katak Yukata ne’e atrai tebes atensaun husi foinsa'e Timor-oan sira, tanba ida ne'e mak ami halao daudaun atividade ida ne’e hodi bele introduz kultura Japones ba foinsa'e Timor-oan sira."

“Ba futuru ami hakarak atu promove liu tan lian japonese liu husi servisu hamutuk ho parseiru sira hakarak atu hari barak liu tan instituisaun sira ne'ebé mak bele oferese kursu lian japonese iha Timor-Leste hodi bele promove liu tan lingua japonese," dehan Embaixadór Kimura.

Iha fatin hanesan, Ministru Joventude, Desportu, Arte no Kultura (MJDAK), Nelio Izaac apresia ho buat ne’ebé hatudu iha festival refere.

"Iha ne'e sira hatudu buat barak ba ita, ho sira-nia volutariu sira ne'ebé sira servisu iha ne'e fó hanoin ba ita-nia joven sira oinsa mak ita iha kriatividade sira (halo buat ne’ebé) la folin bele sai folin fali," dehan nia.

Ba arte, nia dehan, Japaun nia artemarsiais ne'e kuae iha mundu tomak aprende no iha kompetisaun nivel internasional.

“Artemarsiais ne'e la'os atu baku malu, maibé oinsa mak ita atu aprende forma displina, respeitu ita-nia an rasik depois halo ita-nia abilidade profisionalidade ida hodi respeita ema seluk, ajuda ema seluk,” dehan nia.

Entretantu, tuir observasaun Jornalista INDEPENDENTE festival ne’e hetan partisipa maximu husi foinsa'e sira, estudante universidade sira, no seluk tan.