Ministru Agrikultura ho Pekuariu, Peska no Floresta, Marcos da Cruz hatete,  OJE iha tinan 2025 ho montante tokon $25 ne'e hodi aloka ba programa  sira ne'e  atu hasa'e produsaun, iha area agrikultura, liu-liu  hare no sira seluk tan.

Tanba  ne’e, MAPPFF prevee orsamentu iha kapital meno,  hodi sosa  trator  boot 25  unidade, trator kiik 300, depois sosa makina balun hodi  kuda hare  no makina balun atu ko’a hare.

Enkuantu, iha bens servisu nian,  sosa input ne'e barak liu no mos halo  manuntesaun ba trator sira ne'ebe  anterior sira sosa agora destaka  Munisípiu sira.

“Ita presiza sosa pesa, roda, bateria no sira seluk tan,  ita nia mekanika sira indetifika ona ne'e duni presiza osan, atu sosa buat sira ne'e  hodi hadia fila-fali trator sira ne'e,” Dehan Ministru Marcos ba Jornalista sira, hafoin Adiensia Publiku ho Komisaun D, iha Parlamento Nasional, Tersa (22/10).

Nia afirma, tanba trator kuaze  300 resin no trator balu  sei hadia,  trator balun kondisaun diak hela, maibe trator balu presiza halo lelaun , tanba labele hadia ona no entrega ba patrimoniu estadu.

Aleinde ne'e, politika Governu nian hakarak dezenvolve agrikultura  ho vizaun ida katak  fornese ai-han ida ne'ebe barak  ho kualidade  katak nutrietivu sustentavel.

Entaun, programa  ne'ebe buka oinsá  atu aumenta produsaun  no presiza hare'e insfraestrutura baziku hanesan irrigarasaun no problema boot disponibilidade bee.

“Bainhira iha tempu bai-loron be'e laiha no iha tempu udan bee barak ho ida ne'e mak ita nia problema, ne’ebe ita mos tau nafatin orsamentu ba insfraestrutura baziku,” Nia afirma.

Nia afirma, hanesan konstrusaun irrigarasaun sira boot no balun kondisaun diak hela, hanesan irrigarasaun iha Bebui,Larisula Baguia, Bulutu, Laleia, Oebaba, Raibere,Maliana I no Darlau, dadaun irrigarasaun funsiona no  agrikultor utiliza hela.

Maibe, iha irrigarasaun rua halo hela konstrusaun  ho nia progresu 85% ona, iha Galata Venilale no irrigarasaun Laibai, espera katak tinan ida ne'e hotu no tinan oin agrikultor sira bele uza ona.

Depois iha irrigarasaun tolu boot ne'e agora prosesu hela iha CNA kona-ba irrigarasaun maliana 2, CNA halo avaliasaun hotu ona, depois iha irrigarasaun seluk iha Uataba, iha Baucau  no irrigarasaun  Irabere.

“Espera katak tinan ida ne'e, ita bele asina kontratu no tinan oin hodi halo konstrusaun , tinan 2025 ita propoin hela ba irrigarasaun balun tan,” Nia afirma.

Nia informa, iha Kosta Sul, Governu propoin irrigarasaun tolu  hanesan irrigarasaun Maukola iha area Suai Munisípiu  Kovalima, irrigarasaun Betanu Munisípiu Manufahi no irrigarasaun Sahe, sei kobre area  Haturbelihu no Natarbora.

Nune’e, irrigarasaun rua iha Laklo Munisípiu Manatutu no irrigarasaun iha Vemasse Munisípiu Baukau, ne'ebe  MAPPF propoin  ona irrigarasaun sira ne'ebé identidika hodi fó prioridade.

“Tanba atu aumenta produsaun, infraestrutura sira ne'e no ita presiza halo buat sira ne'e,  ne'ebe  ita nia problema tinan ida ne'e, infraestrutura baziku tau orsamentu hodi halo estudu viabilidade,” Nia relata.

Nia fundamenta, iha tinan 2015 halo ona estudu ba mota kuaze 15 no husi estudu ne'e defini katak fatin tolu  mak bele halo estudu ho viabilidade hodi konstrusaun mota  iha Laklo no mota ida iha Same  no ida mota Beluli Kablake nia hun.

“Ne'ebe mota tolu ne'e ita tau hela osan hodi halo estudu kona-ba estudu viabilidade, atu fo resposta hodi kapta  bee iha tempu udan,” Nia konklui.