Ministru Obras Públika Samuel Marçal hatete, Ministériu Obras Públika (MOP), liu husi Institutu Jestaun Ekipamentus no Ápoiu bá Dezenvolvimentu Infrastrutura, Institutu Públiku, la’os de’it atu normaliza mota no estrada maibé fó mós treinamentu ba funsionariu sira, loke mós oportunidade ba timoroan sira ne’ebé hakarak hetan formasaun hodi hetan sertifikasaun internaisonal ekipamentus altu risku.
“Ne’e di’ak tebes ba sira karik sira hakarak aprende, tanba bainhira sira hakarak ba buka servisu iha rai liur fasil tebes-tebes, sira sei hetan salariu ne’ebé di’ak, bainhira sira hetan lisensa internasional,” dehan Ministru Marçal, iha Bidau Lecidere, kinta (24/10).
Governante ne’e hatutan, formasaun ne’ebé dadaun ne’e la’o, la’os de’it ba funsionariu IGEADI, maibé ba mós membru FALINTIL-Forsa Defeza Timor-Leste (F-FDTL), tanba sira sei servisu hamutuk hodi hare bá situasaun emerjensia liuliu dezastre naturais, atu nune’e labele lakon osan ba kompaña sira.
Ministru Marçal hatete, bá sira ne’ebé tuir formasaun la’os de’it atu servisu iha rai-laran, maibé bainhira TL tama iha ASEAN, bainhira iha rai liur mak husu ajuda umanitaria ruma, militar sira mós bele ajuda.
Iha fatin hanesan, Prezidente Konsellu Administrasaun IGEADI, I.P, Ana Paula da Cruz hatete, timoroan barak mak la iha skiil bá servisu iha ekipamentus pezado sira, tanba hare ba nasaun seluk, bainhira atu fó servisu ruma presiza hare ba standar internasional. Tanba ne’e, IGEADI, prepara timoroan sira, liu husi kapasitasaun sira.
“Agora Timor ema lori hela servisu sira ne’e mai, maibé ita la iha standar ida, se ita standa la iha, mak ita sai penton de’it, ita labele halo servisu ida. Tanba ne’e mak IGEADI prepara timoroan sira para fó skill, nune’e projetu saida de’ik mak mai ho kompañia boot sira mai, ita nia ema bele ba servisu, sira husu standar, ita fó standar bá,” dehan Prezidente.
Enkuantu, formasaun ba sertiskasaun ne’e, lansa ona husi Primeiru Ministru, Kay Rala Xanana Gusmão, no formandu sira ne’ebé tuir ona formsaun iha faze dahuluk ne’e hamutu na’in 20 kompostu husi funsionariu IGEADI, I.P na’in 10 no membru F-FDTL na’in 10.
