Sarani Elsa Guterres hato’o lamentasaun ne’e, tanba seguransa no protokolu sira lori Sua Santidade halai maka’as tanba ne’e nia husu halai neneik.
"Ema iha rai li'ur sira-ne'e ema nia seguransa la'o de'it, agora ita-nia ne'e ho kareta, motor mak halai uluk maibé halai hanesan lori ema moras emerjensia nia. Nu'udar sarani ida la simu loos ho atetude sira ne'e tanba ida-ne'e Sua Santidade Papa mak mai atu vizita Timor-Leste la'ós membru Governu baibain sira," dehan komunidade Fatuhada, Elsa Guterres hafoin hamrik iha dalan ne'ebé sua santidade Papa liu atu ba Vizita ALMA, tersa (10/09).
Nia dehan, tuir loloos halo seguransa ne'e lori kareta ho motor halai neineik nune'e komunidade sira bele haree didiak Sua Santidade Papa nia oin no bele hetan bensaun ho di'ak.
"Horiseik mós hanesan ne'e, ami dader de'it iha ona estrada boot tanba hakarak haree duni Papa nia oin no simu bensaun tanba nia ne'e São Pedro nia saseluk ne'ebé mai vizita Timor-Leste, maibé kuitadu horseik mós kareta motor lori Papa ne'e halai mohu loos, ita haree Papa liu ita hanesan anin loos, entaun ohin dader ami mai hamrik tan iha ne'e tanba nia atu liu ba ALMA, maibé ikus mai hanesan de'it ho horiseik," nia lamenta.
Marelia Perreira mós hatete, tuir loloos halo seguransa ne'e halai neineik nune'e ema hotu-hotu sente bensaun ida ne'ebé sua santidade papa fó ne'e.
"Papa fo bensaun mós ita haree hanesan la fo bensaun tanba ema sira lori karreta ne'e halai hanesan anin liu tesik ba ne'e, bensaun ne'e Papa foin foti sae liman iha ita-nia oin ba remata fali iha seluk maibé ida dook ne'e tanba kareta halai mohu loos," nia dehan.
Nia hatutan, maske la haree didiak sua santidade Papa nia oin, maibé ho esperansa katak vizita Sua Santidade Papa ne'e rai doben Timor-Leste bele hetan bensaun wain nune'e mós nia povu sira atu nafatin moris nu'udar maun-alin ba oin.
Tuir observasaun jornalista iha terrenu, komunidade sira dader tuku 6 de'it forma ona iha dalan tasi ibun nia ne'ebé sua santidade Papa liu atu ba vizita ALMA, inklui mós Sekretariu Estadu Arte Kultura (SEAK), Jorge Soares Cristovão ho família nune'e mós ho nia kargu xefia inklui funsionáriu sira. Bainhira Papa liuhosi dalan tasi ibun ne'e iha oras 8:40 ba ALMA no komunidade sira balun nahe tais iha estrada no simu ho haksolok no hakilar viva Papa Francisco.
Tuir oráriu, Papa Fransico sei halo sorumutu ho bispu, padre, madre, diákonu, seminarista no katekista sira iha igreja Imaculada Conceição Katedrál Vila Verde, Dili.
Iha tuku 10h45 Papa Francisco sei halo sorumutu ho padre na'in-38 hosi kongregasaun Jesuita iha Timor-Leste iha rezidensia Nunsiatura Apostolika iha Motael, Dili.
