Tuir Diretór Ezekutivu Klinika Bairo Pite, Inácio dos Santos hatete, agora daudaun Klínika Bairu-Pite stock suplementu nutrisaun la iha hodi fahe ba labarik sira ne’ebé mal-nutrisaun, maibé ho esforsu profisionál saúde sira oinsa atu sensibiliza informasaun ba inan aman sira atu prepara aihan nutritivu ba oan sira atu nune’e bele rekopera husi sira-nia saúde.
“Iha fulan Dezembru 2023 nian, ita rejita kazu mal-nutrisaun hamutuk 33 husi ne’e labarik sira ho idade tinan 10 mai kraik mak afeta no numeru ne’e kompostu husi mal-nutrisaun moderadu 20 no grave 13, entaun sira ne’e agora daudaun iha hela tratamentu nia laran,”dehan nia iha Klínika Bairu-Pite, Segunda, (08/01).
Nia dehan, suplementu nutrisaun la iha entaun difísil atu halo atendimentu ba labarik sira ne’ebé ho kazu mal-nutrisaun ho ida ne’e sira motiva de’it inan aman sira oinsá prepara ai-han nutrisaun di’ak ba labarik sira, atu nune’e bele rekopera hodi fila ba uma.
Aleinde ida ne’e, Klínika Bairu-Pité rejista mós kazu malaria 85, tee-been akuta 107, Infeksaun Respiratória Aguda 731, HIV pozitivu 7, moras kulit 1.339, Asidente tráfiku 40, Maternidade 288, no dengue hamutuk 175.
