Diretor Ezekutivu FONGTIL Valentim da Costa Pinto hatete, situasaun atual moris ne'ebé apertadu liga bá folin Merkadu aas, entaun governu mós tenke haree oinsá hakman servidor públiku sira ne'ebé ho Saláriu ki'ikoan.

"Ami nafatin esperansa Governu da-sia bele halo reviu ho situasaun atual moris ida ne'ebé ke apertadu hanesan ne'e bele iha posibilidade oinsá mak ita bele hakman ita nia servidor públiku sira ne'ebé ke ho Saláriu ki'ikoan," dehan nia iha serbisu knar fatin Fongtil Kaikoli, Segunda (08/01).

Nia hatutan, trabalador sira ne'ebé ke ho Saláriu ki'ik sira ne'e governu bele konsidera iha alternativu duni bele kontinua rekomendasaun governu sesante ka bele halo reviu hodi bele ajuda trabalador sira moris dignu.

"Ema ne'ebé ke mai investe iha ita nia rain karik tenke oferese bu'at ruma di'ak bá ita nia trabalador sira, ne'e bu'at ruma ne'ebé ke hanoin bele iha posibilidade, tanba ami nia maluk sindikatu sira mós proposta katak ne'e tenke kontinua atu hasae Saláriu minimu bá trabalador sira," nia akresenta.

Nia dehan, ne'ebé Fongtil hanoin Governu bele konsidera ida ne'e sai hanesan prioridade ida, maibé labele hasae de'it sein Investimentu, tenke investe no kria Kampu serbisu barak nune'e joven sira bele kobre bá.

"Ita nia Investimentu sira iha area remotas ne'e tenke la'o para ita bele hasae Vensimentu ida báziku ne'e karik ita bele asegura ita nia movimentu sirkulasaun osan ne'e tenke iha ita nia rain, tanba ita hasae osan mais ita nafatin depende bá importasaun osan sira ne'e sa'e mós ita kontribui ba ema seluk nia ekonómia ita nia despezas sira ne'e sai fali ba rai li'ur hotu," nia afirma.

Iha sorin seluk Diretor Ezekutivu Luta Hamutuk José Alves da Costa husu Governu haree fila-fali lei Saláriu Minimu ne'ebé VIII Governu propoin hadia didi'ak lai para Implenta tuir kondisaun no situasaun iha rai laran.

"Ha'u hanoin presiza haree fila-fali lei bá Saláriu minimu ne'e, ne'ebé mak uluk VIII Governu propoin ona para oinsá atu bele, karik presiza hadia, hadia didi'ak lai bá para Implenta tuir kondisaun no situasaun ita nia rain ninian," nia dehan.

Nia haktuir, ema hotu-hotu hakarak Saláriu ne'e boot ho minimu, tanba agora ne'e hasae bá U$ 135 sé la sala, Saláriu minimu maibé nesessidades iha merkadu neeba ne'e sa'e aas entaun osan ne'e la kobre.

Tenke iha Politika di'ak ida hasae saláriu to'o $200 mak di'ak ka kontrolu bá folin sasán ne'ebé mak iha merkadu ne'ebé bu'at rua tenke la'o apar malu tenke iha koridor ida.

"Ezemplu ita bele hetan salariu fulan ida $100, maibé sasán ne'e tenke baratu, ida ha'u hanoin laiha problema. Ha’u haoin kestaun ne’e laos valor ka montante osan ne'e, maibé ninia valor iha merkadu nee lao oinsá," nia salienta.