Karta ne’ebé INDEPENDENTE Online asesu hatudu dirije husi Presidente KHUNTO, Armanda Berta Dos Santos, ba Presidente koligasaun foun Kay Rala Xanana Gusmão, ho númeru referénsia 037/P. KHUNTO/IV/2020.
KHUNTO deklara sai husi koligasaun foun ne’e tanba ho rajaun laiha serteja ba politika rai laran.
Enkuantu AMP foun nudar koligasaun alternativa ida atu forma IX Governu Konstitusionál tanba seidauk hetan konfirmasaun no aseitasaun husi Presidente Repúblika.
Tanba ne’e, KHUNTO nuudar mós na’in ba VIII Governu ne’e deside fó apoiu tomak ba PM Taur Matan Ruak too mandatu remata tinan 2023.
Liu husi karta ne’e, hato’o mós agradese wa’in ba lider Karismatiku no Presidente CNRT Xanana Gusmão, no aliadu anterior sira, hanesan PD, UDT/Frenti Mudança no PUDD, ne’ebé iha kolaborasaun di’ak tebes.
Molok ne’e, iha fatin seluk, Sekretariu Jerál PD, Antonio da Conceição (Kalohan) husu ba PM Taur Matan Ruak karik iha hanoin atu halo remodelasaun tenki consulta ho partidu CNRT nuudar na’in mós ba VIII Governu ne’e.
