Adjuntu Sekretariu Jeral KHUNTO, Luis Roberto da Silva hatete, partidu KHUNTO sempre kumpri desizaun Xefe Estadu nian.
"Partidu KHUNTO sempre iha mudansa, kuandu dehan katak koneksaun justisa nian la di'ak, KHUNTO troka nia ema iha kualker tempu," dehan nia.
Ba membru husi CNRT ne'ebé tama lista pendente, Sekjer KHUNTO ne'e husu atu tetu didi'ak molok foti desizaun.
“Ami husu ba partidu CNRT par tetu mós ba nia lista pendente, karik iha buat ruma mak la loos relasaun ho justisa, ha'u fiar katak partidu CNRT ne’e mesak ema senior no matenek, ha'u fiar katak sira hatene muitu bem ba justisa nia lalaok," dehan nia iha PN relasiona ho deklarasaun husi PR Lu Olo.
“Ha'u fiar katak ita-nia aman Xanana nu'udar mós lider istoriku ida sempre tau interese nasionál aas tebes, ha'u fiar katak sempre iha mudansa iha ne’ebá,” dehan nia.
Maske nune'e, nia dehan, bainhira CNRT foti desizaun oin-seluk PR mak iha kompetensia atu fó pose ka la fó pose.
"Kuandu haree impase politika durante tinan tolu ona, hanoin prezidente repúblika mós tetu ona saida mak di'ak no la di'ak," dehan nia.
Ho preokupasaun ne’e, jornalista tenta husu deklarasaun husi prezidente bankada CNRT, Duarte Nunes, maibé nia lakohi fó komentariu.
Entretantu, molok ne'e Sekretariu Jeral Partidu Demokratiku (PD), António da Conceiҫгo ‘Kalohan’ hatete, lista membru governu pendente la'os kestaun atu koalia tanba governu ne'ebé atu mai ne'e governu dasia la'os governu daualu.
“Ha'u hanoin situasun ida ne’e muda husi oitavo governu ba nono governu. Iha oitavo governu iha Primeiru Ministru ne’ebé mak lidera governu no iha nono governu sertamente iha Primeiru Ministru seluk,” dehan Kalohan iha ninia rezidensia, Tuana-laran, Dili, Sesta (21/02).
Tuir Kalohan, estratejia Primeiru Ministru ida ho Primeiru Ministru seluk konserteza sei la hanesan.
“Iha oitavu governu ema na'in sia (9) ne’ebé pendente ida ne’e la signifika katak konsiderasaun ida ne’e bele influensia nafatin situasaun ida ne’ebé mak ita hasoru ohin loron, tenke salva situasaun povu no nasaun nian,” dehan nia.
