Koordenadór grupu Kalohan Domin, Apolio Franca hatete, eventu ne’e importante tebes tanba loron domin tinan ne’e mós hanesan tinan preparasaun ba eleisaun.

“Ba ita nia lideransa sira oinsá atu simu eleisaun ne’e ho domin no dame,” dehan nia, iha jardín 5 Maiu, Kolmera-horisehik.

Nia afirma, husu ba juventude hotu iha territóriu atu hakribi violénsia, tanba hakarak nasaun ne’e nia di'ak tenke hadook-aan husi konflitu. Tenke kria domin no dame iha uma laran depois mak bele lori ba li'ur.

Iha fatin hanesan, estudante Institutu Ciéncia Saúde (ICS), Natália dos Anjos hatete, loron domin dala barak ema dehan hadomi entre namoradu, maibé fahe domin ba ema hotu ne’ebé hadomi.

Lu-Olo: Laiha Buat ida liu Domin

Entretantu, Kandidatu Prezidente Repúblika, Francisco Guterres ‘Lu-Olo’ suzeiza loron Valentine Day atu Timor oan hotu bele hadomi malu, liu husi uma laran hodi TL bele moris nakonu ho domin.

“Laiha buat ida que di'ak liu domin, ohin loron valentine day fo mai ema hotu iha mundu ne’e para atu bele hadomi malu,” dehan nia iha sede kampaña Prezidente Repúblika, Ai-Mutin, horisehik.

Hadomi malu ne’e, Tuir Lu-Olo dehan, ne’e natureza ba ema hotu ne’ebé moris sira, ate liga ba buat sira la hatene ko'alia, lahatene iha sira nia lian, sira mós hadomi malu.

“Ha'u hanoin katak buat ida hadomi malu ne’e di'ak tebetebes, tanba hola parte ba virtude umanu ninian,” dehan Lu-Olo.

Valentine day, Lu-Olo dezeiza katak loron ida espesiál ba Timor oan sira hotu, liuliu kazadu sira para atu kontinua hadomi malu nafatin, hadomi sira nia oan sira nia família no joven sira hadomi malu hodi hametin pás no unidade iha TL .