Objetivu entrega fornesimentu Iron Folic Acid nian hanesan parte ida husi projetu pakote intervensaun espesifiku nutrisaun nian atu responde ba subnutrisaun Inan, labarik no adolesente iha TL, ne'ebé sei implementa husi Ministériu Saude no Fundus Nasoens Unidas ba Infansia (UNICEF), ne'ebé hetan finansiamentu tomak husi povu Japaun.
Vise-Ministru ba Fortalesimentu Instituisional Saude (VMFIS), José dos Reis Magno hatete, Iron Folic Acid ne'e nia objetivu atu fornese ba labarik feto idolosentes hodi hasa'e nutrisaun labarik sira nian.
Tanba, iha Timor-Leste pursentu 32 husi labarik-feto sira ho idade 14-19 sofre anemia, ne'ebé mosu tanba mudansa fiziku no emosionál iha sira-nia isin, ne'ebé presiza nutrisaun adisional.
“Iha mudansa konjunta ida atu hasa'e labarik-feto adolesente sira-nia saúde no moris-di'ak iha Timor-Leste, Governu Timor-Leste ohin simu tablet ida husi Governu Japaun ho Fundu Nasoins Unidas ba Labarik,” dehan Vise-Ministru iha Salaun Enkontru MS, Palasiu da Cinzas Kaikoli, Sesta (08/07).
Vise-Ministru dehan, Nutrisaun adolexente nu'udar komponente importante ida husi saude publika no hasoru anemia defisiénsia besi entre labarik-feto adolesente sira nu'udar prioridade ida ba Timor-Leste.
Tan ne’e, Governu TL hatoo agradese ba Governu Japaun ho UNICEF ninia esforsu tomak ne’ebé atu hasa’e nutrisaun adolosentes labarik feto sira nian.
"Agradese tebes ba apoiu husi UNICEF no Governu Japaun iha ita nia esforsu atu hasa'e nutrisaun adolexente labarik feto sira nia. Inisiativa ida-ne'e ezemplu kona ba kbiit parseria nian hodi rezolve dezafiu saúde nian ne'ebé importante”, Dehan Governante.
Iha fatin hanesan Embaixadór Japaun iha TL Tetusya Kimura hatete, Governu Japaun ho TL servisu hamutuk iha área saúde nian durante tinan barak ona, no fiar katak dezenvolvimentu rekursu umanu nuudar objetivu ida ne’ebé importante liu ba nasaun ida no hadia estatutu nutrisaun sei sai hanesan baze ba ema ida-idak.
Embaixador dehan, durante tinan rua-nulu (20) liu desde restaurasaun independénsia, TL servisu ona hodi hadiak estadu nutrisaun ba nia labarik sira. Maibé, ne’e nafatin sai dezafiu.
Nia dehan, ema hotu konsiente ba estatistika neebé hatudu katak pursentu haat-nulu resin hitu (47%) husi labarik sira ho idade tinan lima ba kraik mak sofre atrazu kresimentu ka raes badak.
“Ha’u hein atu rona katak politika no estratéjia espesifika husi Governu atual ba iha área nutrisaun infantil, no espera katak rezultadu sira husi projetu ne’ebé finansiadu tomak husi Governu Japaun, sei utiliza ho diak,” tenik nia.
Nia akresenta, Governu Japaun esforsu atu srvisu hamutuk ho Governu TL atu resolve kestaun ne’e, tanba projetu neebe servisu konaba estadu nutrisional inan isin rua, inan no labarik sira.
No mós prepara labarik feto adolesentes atu sai potensial ba inan neebe saudavel neebe sai mos importante iha projetu nee.
“Hein katak, suplementasaun diaria ferru no asidu foliku neebe entrega ohin, sei ajuda reduz risku husi todan menus bebe foin moris, anemia materna no defisiénsia ferru nian. Ha’u hein katak suplementus hirak nee sei bele mós ajuda labarik feto adolesente sira, sira nia familia no belun sira iha kofiesimentu diak liu tan kona ba importansia husi nutrisaun no dieta equilibrada iha sira nia moris loron loron,” nia hatoo.
Iha biban ne’e, Reprezentante UNICEF iha TL Billa Durani senti onradu ba Governu Japaun ne’ebé apoiu ona Suplementadu Sulfatu no Saude Foliku ba Governu TL liu husi MS hodi ajuda labarik feto adoloxentes sira nia nutrisaun iha TL.
Adolesensia mak faze kresimentu segundu ne'ebé lalais liu hafoin labarik, no faze ida-ne'e akompaña husi nesesidade nutrisaun ne'ebé aumenta. Faze ne'e, iha mudansa fizolojika hamutuk ho reatividade emosional, kontrolu kofiesivu no auto-regulasaun ne'ebé influénsia adolexente sira nia desizaun no desizaun ai-han.
