Governante ne’e dehan, Timor-Leste iha bee moos pursentu neen-nolu (60%) ne'ebé husik estraga, tanba sosiedade la iha konsiensia hodi utiliza bee tuir nesesidade ne'ebé iha.
“Bee barak mak husik de'it ba iha fatin ne'ebé la uza. Tanba ne'e ha'u dehan, ita nia bee kuaze 60% soe deit ba fatin sira ne'ebé la utiliza, maibé iha fatin barak bee susar liu," dehan Ministru obras Públika iha Salaun Enkontru BTL.EP Kaikoli, Kinta (07/09).
Ministru hatutan, fatin barak bee la iha, hanesan iha Singapura sidade ida ne'ebé sai ezemplu di'ak ba mundu tomak, sira iha problema bee no sira dada bee husi Malazia maibé sira konsege organiza ho diak, no ema hotu hetan bee hodi hatama reseita ba estadu.
Nia argumenta, lahatene, Timor-Leste bainhira los mak sosiedade sira utiliza bee to'o iha faze ida hanesan ho Singapura.
Tan ne'e, Governante husu ba Prezidenti Bee Timor-Leste, Empreza Públika (BTL,Ep) atu halo sosializasaun ba sosiedade sira hodi komprende didiak oinsa atu utiliza bee ne'e ho di'ak, tanba bee ne'e liga direita ba ema nia moris.
"Ita presiza ajunta forsa ida halo servisu ida atu bee ne'e bele to'o ba ema hotu-hotu," katak Ministru.
Iha fatin hanesan, Prezidenti BTL Carlos Peloi husu ba lideransa komunitáriu no mós komunidade sira hotu atu koopera hamutuk ho BTL hodi fornese bee moos bae ma hotu.
Nia dehan, dadaun ne'e, BTL halo hela sosializasaun ba komunidade sira liu husi média BTL no husi média sira seluk, tan ne'e nafatin husu ba komunidade sira atu uza bee ho kuidadu no tenki tuir nesesidade ne'ebé iha.
