Tuir Presidente Tribunal Rekursu, Deolindo dos Santos hateten, parte tribunal halo rekursu ba kandidatu sira no horseik (kuarta) hasai ona lista defenitiva ba kandidatu sira hodi admite.

"Tanba ne'e mak ohin ita realiza serimonia hodi dada númeru sorteiu ba kandidatu sira", dehan nia liu husi nia diskursu hafoin dada númeru sorteiu ba kandidatu sira, iha sala Tribunal Rekursus.

Nia dehan, hafoin kandidatu sira dada ona númeru sorteiu mak tribunal sei komunika ba Sekretariadu Tékniku Administrasaun Eleitoral (STAE) no Comisaun Nasional ba Eleisaun (CNE) hodi kontinua ba prosesu bulletin votu.

Molok ne’e, Presidente Repóblika Fransisco Guterres Lu-olo Dekreta ona loron kampaña, hahú iha loron 2 to'o  16 Marsu, no loron Votasaun ba eleisaun prezidensiál sei realiza iha loron 19 marsu tinan ne'e.

Kandidatu na'in 16 inklui feto na’in 4, admitidu husi partidu mak hanesan, partidu KHUNTO Armanda Berta dos Santos, partidu FRETILIN Francisco Guterres Lúo Olo, husi PD Mariano Asanami Sabino, Partidu Demokrátiku da Repúblika de Timor (PDRT) Anacleto Bento Ferreira.

Aliende, kandidatu independente mak hanesan, kandidatu José Ramos Horta ne’ebé hetan apoiu forsa politika husi partidu CNRT, Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres, Constâncio da Conceição Pinto, Antero Benedito da Silva no Martinho Germano Gusmão.

Enkuantu rezultadu dada númeru sorteiu ba kandidatu sira mak hanesan, Isabel da Costa Ferreira (1), Hermes da Rosa Correia Barros (2), Maria Ângela Freitas da Silva (3), Rogério Tiago Lobato (4), Anacleto Bento Pereira (5), Francisco Guterres Lú Olo (6), Maria Milena Lopes de Jesus Pires (7), Lere Anan Timur (8), Armanda Berta dos Santos (9), Antero Benedito da Silva (10), Constâncio Pinto (11), Virgílio Guterres (12),Martinho Gusmão (13), José Ramos Horta (14), Felisberto Araújo Duarte (15), no ikus liu Mariano Assanami Sabino (16).