Lei husi Sistema Nasionál Saúde nian no aprova medida esesionál no temporáriu Vijilánsia sira ba resposta pandemia  Covid-19 nian, ne’e aprezenta husi Ministra Saúde, Odete Maria Freitas Belo.

“Aprovasaun ninia esensia loloos maka ita iha lei sistema saúde iha ne’eba, iha lei alterasaun ba iha sistema saúde ne’e iha artigu 3 dehan katak bele iha medidas esensionais sira,” Ministru Prezidensia Konselu Ministru (MPKM), Fidelis Manuel Leite Magalhães, hateten hafoin reuniaun KM iha Palasiu Governu, Kuarta (16/02).

Agora medidas esensionais ne’e, ida ne’ebé mak iha fulan hirak liu ba Parlamentu Nasionál aprova dehan katak medidas ne’e iha artigu 3 nia iha validade to’o 19 fulan Marsu 2022, agora atu hotu ona.

Entaun Governu sei husu fali atu aumentu tan loron 120 hafoin loron 19 fulan Marsu, nia bele kontinua nafatin ba oin, hodi nune’e bele fó nafatin kbiit legál ba governu liu-liu iha Ministériu Saúde atu abele hola medida nesesáriu sira karik iha fali surtu ruma ka aumentu sira drástiku ba moras nian.

“Tanba sein abrigu legál ida ne’e Ministériu Saúde ho ezekutivu sira labele halo atuasaun sira,” nia dehan.  

Alterasaun sira ne’ebé introdús ona ho objetivu prinsipál mak hanesan, ida introdús obrigatoriedade realizasaun teste ba indivídu sira ne’ebé tama iha territóriu nasionál.

Rua izolamentu terapéutiku ne’e tenke preferensialmente iha rezidénsia, karik hatudu razaun médika ne’ebé determina internamentu iha estabelesimentu saúde.  

Tolu izolamentu profilátiku obrigatóriu, iha estabelesimentu saúde, rezidénsia ka sentru izolamentu ne’ebé efetua husi Estadu, ba indivíduu sira ne’ebé tama iha territóriu nasionál no la aprezenta dokumentu komprovativu vasinasaun kompleta, hatudu sintoma sira, iha rezultadu pozitivu ba teste ne’ebé realiza bainhira tama iha territóriu nasionál ka hetan iha territóriu nasionál no iha ona kontaktu besik ho indivídu ne’ebé ho rezultadu pozitivu husi teste PCR.

Haat ne’ebé kondisiona mós iha asesu ba fatin serbisu  husi funsionáriu públiku, ajente no traballadór administrasaun direta no indireta Estadu nian, mediante aprezentasaun komprovativu vasinasaun kompleta, kontra SAR-COV-2/COVID-19 ka iha alternativa komprovativu rezultadu negativu ba teste SAR-COV-2/COVID-19, ne’ebé realiza molok la liu loron lima ka aprezentasaun sertifikadu rekuperasaun ka rekuperasaun no alta médika.

Lima, determina mós punisaun ho multa ne’ebé ho valór entre dolar amerikanu 30 no 250 , ba indivíduu sira ne’ebé la kumpre norma sira ne’ebé prevee ba  tama iha territóriu nasionál, nune’e mós suporte husi despeza ida-ne’e rezulta izolamentu profilátiku ida-ne’e.

Entretantu, Ministra Saúde sei aprova Diploma Ministeriál ba modelu dokumentu komprovativu vasinasaun kompleta no sertifikadu rekuperasaun no alta médika.