La’os lentu no karun de’it, PM Taur mós konsidera kompaña telekomunikasaun sira iha Timor-Leste mós naok ninia kliente sira.
“Ita-nia internet iha Timor-Leste lentu liu iha mundu no karun liu iha mundu, kompaña sira iha ne’e na’ok ita, pulsa lorloron lakon beibeik, foin koalia dala ida pulsa laiha ona, ida ne’e ita mós matenek, se ita la matenek sira halo ita hanesan ayam potong,” dehan PM Taur hafoin vizita edifisiu Ministériu Justisa, Sesta (09/09).
Tuir nia esperensia, Xefe Governu ne’e dehan, iha situasaun pandemia Covid-19 ne’ebé obriga membru Governu hotu tenke servisu via online, rede internet mate-moris de’it.
“Sira estuda ne’e ba fulan ka ba ne’ebé? tempu teknolojia nian ita ba mangame hela, ita gava aan maibé la hatene saída mak ita atu halo,” katak nia.
Taur hatutan, governu autoriza kompaña telekomunikasaun sira hodi dada liña internet husi Indonezia maske merkadu uitoan maibé hakarak internet ne’e tenke lalais no baratu.
Entretantu, durante ne’e mosu preokupasaun barak husi públiku kona-ba rede internet husi kompaña telekomunikasaun Timor Telecom, Telkomcel, no Telemor ne’ebé lentu.
Entretantu, iha tinan 2021, Ministru Transporte no Komunikasaun, José Agostinho da Silva hatete, governu orienta Autoridade Nasionál Komunikasaun (ANC) hodi hasa'e frekuénsia internet husi megabyte 200 ba gigabyte 1.
“Ita-nia internet lenuk tanba ita uza 200 megabyte de'it, tanba ne'e ha'u dehan ona ba Autoridade Nasionál Komunikasaun oinsá mak atu hasa'e tan ita-nia frekuénsia,” dehan nia iha iha 17 Maiu 2021.
Tuir nia, ida ne’e nu’udar solusaun temporariu tanba maske hasa’e volume husi 200 mb ba 1 gb maibé bainhira uza barak sei afeta nafatin.
