Paisajen ida ne’e mak mosu iha Konferensia Imprensa líder Fretilin sira hodi haklaken vitoria ne’ebé Francisco Guterres Lú Olo ho Mari Alkatiri hetan iha Kongresu Nasionál Fretilin ba dala lima.
Iha sesaun husu no hatan, jornalista sira hasai lia-husu kona-ba pozisaun Lere nian iha estrutura partidu ne’ebé lidera dala ida tan husi Lú Olo nu’udar Prezidente no Alkatiri nu’udar Sekretariu Jeral.
"Ha'u hanoin ha’u fó Sekretáriu Jerál Marí Alkatiri," dehan Lú Olo relasiona ho lia-husu husi jornalista sira, iha Sentru Konvensaun Dili, Sesta (09/09).
"Ha'u hanoin Kamarada Lere iha ne'e, nia mak sei hatan," Alkatiri soe hikas lia-hatan ba Lere ne’ebé tuur hela iha sorin.
Ho lia-fuan husi Alkatiri ne’e, Lere nia matan hahú mean, nia matan-been nakonu. Nonook de’it kuaze menutu balun hafoin hatan.
"Di'ak, obrigadu, la'ós ha'u mak eleitu ba husu fali ha'u, maibé asuntu ne'e kona-ba ha'u, ha'u dehan ba Kongresista sira, ba povu Timor-Leste tomak, aswain ne'ebé mak fakar sira-nia raan, ha'u susesu ba Kongressu ida ne'e mak rekoñese segundu jerasaun, ne'e katak ha'u-nia maluk na'in ualu ne'ebé mak ohin loron la hamutuk ona ho ita, dala-ruma ita haluha tiha. Agradese ba Kongressu ida ne'e bele mós rekoñese mós sira, husi saudozu Mau-hudo, Rankadalak, Kilik Waigae, Bere Malai Laka, Sakinere, Hali Nere, Holi Natxa, Nelo Kadomi Timur, Mauk Moruk, ne'ebé ohin laiha ona.”
"Tanba ne'e mak ha'u hanoin katak la'ós fó tomada pose atu ha'u responde, mais ha'u-nia pozisaun iha Fretilin, ha'u Fretilin nafatin, rekoñesimentu hanesan segundu jerasaun komité sentrál Fretilin ninian, ha'u papél ida ne'e, maibé atu ba tuur iha estrutura, ha'u la hanoin, mai iha ne'e atu serví," deklara Lere.
Tan ne’e, nia hatutan, bainhira estrutura halo diskusaun nia nonok no nia hanesan militante baibain, membru komité sentrál hanesan segundu jerasaun reprezenta nia maluk na’in ualu ne'ebé ohin loron la hamutuk ona.
"Ha'u servisu nafatin ba Fretilin halo oinsá? Fretilin kumpre nia devér sagradu, ne'ebé lulik, responsabilidade ne'ebé mak todan ba Fretilin liberta ona pátria, agora tenke liberta povu husi ki'ak no mukit," dehan Lere.
Tuir nia, nia la preokupa pozisaun iha Fretilin, Prezidente Partidu no Sekretáriu Jerál Fretilin, fó obrigadu de'it.
"Fó ba ha'u-nia maluk sira seluk, ha'u hanesan membru komité sentrál FRETILIN segundu jerasaun, hanesan membru komité sentrál sira seluk loos ona, la presiza tuur iha estrutura atu servisu ba Fretilin. Ne'e hatudu ona tinan 20 resin mais tinan 20 resin, tinan 40 ona," dehan nia.
Lere agradese ba Lú Olo ne'ebé uluk terus hamutuk iha ailaran no ba Alkatiri ne'ebé nu'udar fundadór partidu.
Tama Lista Datoluk Membru CCF
Prezidente Komisaun Nasionál Preparasaun no Organizasaun (KNPO) no Adjuntu Sekretáriu Jerál Fretilin Sesante, Flávio Maria Guterres da Silva informa, membru CCF simu hotu ona posse.
"Pakote ne'e ida de'it, númeru dahuluk iha lista ne'e mak prezidente partidu Lú Olo, númeru daruak mak Sekretáriu Jerál Fretilin, Marí Alkatiri, no datoluk mak Kamarada Lere hanesan membru Komité Sentrál Fretilin segundu jerasaun nian, depois tuir fali sira seluk to'o 100," informa Flavio.
Flavio dehan, lista membru CCF aprova liu husi votasaun sekreta ho votus 688.
"Estatutu ida uluk membru efetivu ne'e 65, suplentu 25, daudauk ne'e, kongressu mós aprova rezolusaun ida hodi aumenta númeru membru komité sentrál ne'e ba 100, efetivu 75, suplentu 25."
Iha semana oin, nia informa, sei iha reniaun komité sentrál hodi kompleta órgaun partidu nian hanesan Komisaun Nasionál Fiskalizasaun, Vise Prezidente, no Adjuntu Sekretáriu Jerál atu apoiu lideransa sira-nia servisu.
Iha Kongresu Nasionál dalima ne’e, nia hatutan, rekomenda mós atu iha fulan Novembru realiza Konferénsia Nasionál ida hodi halo diskusaun detailu liu ba manual programa polítika no estatutu, teze Kongressu Nasionál dalima atu hamoris programa no komprimisu eleitoral ba 2023.
Razaun Lere Retira husi Pakote Alternativu
Jeneral Reformadu no Membru Komité Sentrál Fretilin jerasaun daruak, Lere Anan Timur klarifika kona-ba ninia razaun retira husi pakote alternativu ne’ebé delegadu balun prepara.
"Ha’u uluk dehan ba kongresu mak ha’u deside, ne’e mak ha’u horisehik (Sesta) iha kongresu dehan katak ‘se imi asembleia ne’e mak hakarak fó konfiasa ba ha'u atu kandidata hodi forma ho pakote ida, imi mak deside’, mais iha ne’ebá ne’e ema ida la deside no ha'u hatete tan ‘kuantu maun Marí ho Lú Olo avansa nafatin, ha’u labele kompete fali ho sira’, tanba ha’u-nia konseitu ida ne’ebé uluk ha'u kaer mak ida ne’e ‘ha’u mai la'ós atu kompete ho ema ida no la'ós mós atu sai adversáriu ba ema ida’," dehan Lere iha Sentru Konvensaun Dili, Sesta (09/09).
Ho ida ne’e, nia hatutan, ikus mai mosu pakote uniku no Lú Olo ho Alkatiri mak manan nafatin.
“Laiha duvida tanba pakote uniku ne’e no parabéns ba sira.”
Kona-ba pakote, Lere hatete tan, nu’udar gerileiru ida kuandu lakon primeira kombate, iha segunda kombate tenke matenek.
"Ida ne’e mak dehan katak combater com inteligência no horisehik ha’u haree ambiente la di'ak no eleisaun direita karik ha’u kompete duni tanba massa ne’e iha kraik, ai-leba, ain-tanan, oan-kiak no faluk sira ne’e mak Fretilin no eleisaun direita ne’e ha’u bele manan."
Maibé ida ne’e kongresu, see mak mai? la hatene no ha’u la prepara pakote ida, maibé kamarada sira seluk hanoin forma pakote. Maibé ha’u kuandu dehan ba tiru-malu ne’e ha’u ba ho ha’u-nia kompañia ne’ebé mak ha’u prepara par ha’u ba ne’e ita mate hotu ka ita fila dala ida mais kompañia ida mak konvida fali ha’u ba hamutuk fali ho nia ne’e há’u laran ragu-ragu." Nia hateten.
Lere hatutan, pakote alternativa ne’e la'ós nia mak halo, maibé alternativa povu mak halo alternativa no iha kongresu nasionál mak halo alternativa.
"Sira husi kotuk ko'alia alternativa, maibé iha oin la ko'alia ona alternativa, ne'e mak ha'u ko'alia ekipa Rui Araújo, ha'u kuandu tiru-malu, tiru-malu ho ema ne'ebé brani, ba oin, ba oin, ita dehan hakiduk, hakiduk dala ida, la'ós ida ba oin, ida hakiduk, ne'e ha'u hanoin katak ha'u la brani kombate ho ida ne'e, ne'e mak ha'u hanoin la buat ida, Fretilin nafatin."
Maske nune’e, Lere hatete, susessu boot ne’ebé nia hetan iha Kongresu Nasional mak rekoñesimentu ba nia nu’udar membro CCF jerasaun daruak.
“Iha 2015 katuas sira ne’ebé reforma hakarak fila mai uma-lulik Fretilin maibé dehan katak estatutu la fó dalan, entaun sira ba fali buka maun sira seluk hanesan Maun Xanana no Taur Matan Ruak iha CNRT ho PLP hodi hamutuk ho sira.”
"Há’u apela katak há’u la faz parte iha estrutura partidu Fretilin nian no apenas hanesan membru komité sentrál Fretilin segunda jerasaun nian, ida ne’e de’it mós to'o ona tanba rekoñese ona ami na'in sia maske sira na’in 8 la hamutuk ona ho ita hotu maibé sira mós kontente, maske sira mate maibé ita sira ne’ebé sei moris la haluha sira."
Lere dehan, nia sei la envolve iha estrutura líderansa Fretilin ne'ebé lídera husi Lú Olo ho Alkatiri.
"Ha'u la envolve, iha Kongresu mós ha'u dehan katak ha'u orgullu segunda jerasaun komité sentrál Fretilin mós to'o ona, ha'u servisu nafatin ba Fretilin no servisu hamutuk nafatin ho ha'u nia maun sira ne’ebé uluk hanesan komandu da luta, hanesan maun Xanana, Marí Alkatiri, Ramos Horta no Taur atu lori nasaun ne’e ba oin, enkuantu ami sei moris," katak nia.
