Hanesan públiku hatene, Lú Olo no Alkatiri lidera ona Fretilin durante tinan 21, no ho konfiansa ne’ebé hetan iha Kongresu Nasionál partidu Fretilin ba dala lima, signifika figura na’in rua ne’e sei kontinua lidera Fretilin to’o tinan 2027.

Somotxo deklara, nia deside rezigna an husi membru Komite Sentral Fretilin (CCF) hodi fó oportunidade ba kuadrus potensial sira seluk ne'ebé durante ne’e servisu maka'as ba partidu Fretilin.

"Ha'u Membru Komité Sentrál Fretilin iha 2011, ohin (Sabadu), ami na'in haat, ha'u, Kamarada Osorio, Rui Maria de Araújo no Luís Lobato, ami haree katak ha’u tinan 10 Membru Komité Sentrál, ne'e hanesan tempu naruk tebes ha'u kontribui ba Fretilin," dehan nia iha Sentru Konvensaun Dili, Sabádu (10/09).

Hahalok ne’ebé sira na’in haat hatudu, Somotxo dehan, atu fó netik fatin ba kuadrus foun atu sira mós ezerse sira-nia kapasidade.

"Tanba ami hatene katak ami ne'e labele reziste to'o fali tinan hira, tanba ne'e ami sei moris pelumenus fó netik dalan ba sira atu akompaña sira hala'o sira-nia servisu," deklara Somotxo.

Eis membru CCF ne’e hatutan, ema balun karik sei mate iha CCF no nunka akompaña ninia kuadru sira la'o no servisu oinsa.

"Desizaun demokrásia ne'e halo liu husi dalan rua; hatun ita liu husi eleisaun, militantes rasik mak hatun ita, ka ita mak hanesan demite ita-nia aan. Ohin, akontesimentu ida ne'e atu oferese ha’u-nia aan voluntariu sai husi Komité Sentrál Fretilin hodi fó fatin ba kuadrus potensiál sira seluk.”

Tuir nia, sira na’in haat ninia rezignasaun sei la fó impaktu ba Fretilin tanba uluk sira sei sai nu’udar militante mós sira servisu no sira sei pertense nafatin ba partidu.

"Ha'u fiar katak sira mós sei hala'o servisu, prontu kalan ka loron kuandu haruka ne'e sira tenke ba, hanesan ami nia ezemplu ne'ebé mak ami hatudu, ne'ebé ha’u fiar katak Fretilin sei hamutuk nafatin hasoru eleisaun.”

Nia afirma, karik problema no sira sai ne'e la'ós atu hamonu Fretilin.

"Ami la halai ida, partidu ne'e ema barak no família barak mak mate ba Fretilin, ami mós sei mate iha Fretilin," Somotxo deklara.

Tuir Somotxo, iha eleisaun 2023 depende ba polítika, maibé se mantein ho lideransa atuál konserteza Fretilin sei la manán.

"Ami hatene tiha ona Fretilin sei la manan mesmu ke ami esforsu maka'as, idaidak investe nia osan mós realidade mak ida ne'e, sei la manán. Manán mós ema barak sei halai hotu husi Fretilin ba (partidu) kiik-oan sira hodi ukun rai ida ne'e," katak nia.

Tanba ne’e, nia afirma, presiza mudansa iha Fretilin laran no sira sei luta nafatin atu aban-bainrua halo mudansa interna iha Fretilin.

"Ami loron primeiru ami tenta liu husi pakote, maibé labele avansa tanba la priense rekejitus," katak nia.

Maske nune’e, Somotxo afirma, nia ho eis membru CCF na’in tolu seluk, sei servisu hamutuk nafatin ho sira seluk iha Fretilin atu lori vitoria ba Fretilin.

"Uluk Membru Komité Sentrál 65, agora ne'e membru Komité Sentrál Fretilin 75 ona, ne'e estrutura ne'ebé boot, bele halo kobertura Timor-Leste tomak ho di'ak atu Fretilin manán iha 2023."

Iha fatin hanesan, eis membru CCF, Luís Lobato hatete, nia rezigna an husi membru CCF tanba kuadru barak ne'ebé mak seidauk hetan oportunidade.

"Se la'e ita labele rezolve problema, tanba ema barak presiza tama, maibé fatin laiha, ami konsiente katak programa kadernizasaun iha partidu laran tenke la'o. Ha'u membru CCF tiha ona, labele kontinua hodi la fó fatin ba ema seluk," katak nia.

Tanba, nia hatutan, ema sai membru CCF ne'e parte ida husi nia kareira polítika.

"Dala ruma ita hakarak sai Koordenadór, Deputadu, kritéria hatete tenke liu husi membru CCF, entaun ami fó fatin ba sira, aban-bainrua hakarak sai deputadu iha kritéria ona," dehan nia.

Lobato hatete, Fretilin ne'e matenek barak tan ne’e tenke fahe oportunidade ba malu no konsiente katak hanesan parte kadernizasaun polítika partidu nian.

"Ami-nia desizaun laiha implikasaun ba partidu, ami prontu oras 24 hodi serví ba partidu, atu servi partidu la presiza sai membru komité sentrál Fretilin."

Prezidente Komisaun Nasionál Preparasaun no Organizasaun (KNPO) no Adjuntu Sekretáriu Jerál FRETILIN sesante, Flávio Maria Guterres da Silva hatete, mosu diskusaun boot bainhira aprezenta lista ba membru CCF.

Tan ne’e, ikus mai membru balun husi atu hasai sira-nia naran husi lista hodi fó fali ba sira seluk.

"Prontu ida ne'e aktu ida ne'ebé di'ak atu ajuda no servisu ba partidu, maibé atu dehan katak atu servisu iha baze no lori vitória ba Fretilin ne'e la'ós husi membru komité sentrál mesak, maibé membru komité sentrál, lideransa, kuadrus no militantes hotu-hotu ke la tuir iha estrutura mós servisu hotu, ita atu hanoin katak oinsá mak Fretilin bele forte ba hasoru eleisaun 2023," katak nia.

Ba sira ne’ebé husu hasai sira-nia naran husi lista membru CCF, nia hatete, sira sei kontinua servisu hamutuk hodi lori vitória ba Fretilin.