"Joven sira imi tenke hametin unidade, imi tenke hanoin imi nia aman- inan, avó sira hotu nia terus no mate tanba hamlaha, inimigu oho, terus ba kastigu mak ohin loron ita hetan independénsia, ho nune'e imi tenke hadomi malu," dehan nia, iha Aeroportu Internasionál Nicolau Lobato, Sesta (9/9).

Nia dehan, nasaun ne'e ukun-aan ona no sei entrega ba jerasaun foun sira atu lori ba oin ho nune'e tenke respeita malu labele kria inimigu ba malu, maibé kontinua hadomi malu.

"Katuas sira lakon hotu ona, antes katuas sira lakon hotu ona nasaun ne'e entrega hela ba imi oan sira. Tanba ne'e imi lakon tiha espiritu sidadania bainhira imi boot, imi la hatene eduka imi nia oan sira tanba imi nia ezemplu fó daudaun , hatudu daudaun fahe malu , baku malu no oho malu , ne'e ezemplu la di'ak ida," hatete Xanana.

Nune'e, hanesan lider ida iha Timor-Leste apelu ba joven hotu sente an nu'udar sidadaun rai ne'e nia oan tenke buka respeita malu, hahú husi uma laran sai to'o liur hodi hametin harmonia iha sosiadade. Tanba, ohin loron labarik sira maioria lakon tempu ba de'it média sosiál hanesan google, facebook, WhatsApp no seluk tan hodi kria mak problema.

Tanba ne'e, imi utiliza média sosiál sira hodi akompaña uituan mundu ba, husu nafatin ba joven sira, hadomi malu no fó liman ba malu kria dame iha nasaun laran atu hatudu ba mundu katak Timor Leste nasaun ne'ebé hakmatek. Tanba jerasaun tuan sira mate, sei husik hela nasaun ne'e ba jerasaun foun sira nia liman, nune'e prepara an nafatin hodi lori nasaun ne'e ba oin .

Molok ne'e, Primeiru Ministru Taur Matan Ruak lamenta no sente triste, bainhira haree joven sira kontinua asaltu malu iha rai laran.

“Ha'u lamenta, ha'u triste loos hare’e ha'u nia oan foinsa'e sira asaltu malu, hanesan ita boot sira hatene nasaun ida ne’e se nia, ne’e jerasaun foun nia, mais ami triste fali bainhira jerasaun foun sira foti riba fali ba rai naruk ne’e ha'u triste loos,” dehan PM Taur.