“Se kazal ne’e deklara katak sira inosente, sira la hatene sasan ne’ebé rai iha printer laran, sasan ne’e ema Filipina na’in tolu mak tau, no konsege prova duni iha tribunal katak arguidu ema Filipina na’in tolu mak tau droga ne’e, lasu kazal Timor-oan ne’e lori ba Indonezia, bele konvense hodi lori fila sira nain rua,” dehan Diretór Ezekutivu JSMP Luis Oliveira Sampaio ba jornalista sira iha nia knar fatin, Kolmera, Tersa (11/06).
Maibé, Luis hatete, bainhira la konsege prova ida ne’e susar tebes atu konvense governu Indonezia, liu-liu autoridade justisa, atu bele lori fila sira nain rua mai Timor Leste.
Kona-ba hanoin balun ne’ebé husu atu governu nomeia advogadu ida hodi halo koordenasaun ho parte Indonezia nian, Diretór JSMP ne’e dehan ida ne’e la presiza.
“Se ita haruka ita-nia advogadu ka see de’it atu koordena de’it, atu asegura de’it prosesu ne’e bele lao ida ne’e la presiza, tanba relasaun ofosial diplomata sira bele halo ida ne’e,” dehan nia.
Maske nune’e, nia espera katak estadu Timor Leste sei luta oinsa atu salva nia sidadaun ne’ebé daudauk ne’e iha Indonezia nia liman.
Nia dehan, presiza mós halo ona prosesu julgamentu ba ema Filipina na’in tolu ne’ebé deskonfia sai na’in ba droga hodi bele hetan obsaun ka posibilidade atu salva kazal Timor-oan.
