Komisariu KFP asuntu Disiplinar, Komisariu António Freitas informa, nia parte daudauk ne’e hala’o hela prosesu ba pesoal Funsionariu Públiku (FP) ne’ebé deskonfia envolve fasilita JSP no AS hakat ba Indonezia.
“Ha’u dehan oknum funsionariu mak evolve iha laran, maibé ha’u la mensiona instituisaun ida nia naran, tanba agora dadaun iha hela prosesu investigasaun nia laran,” informa Komisariu Antonio ba jornalista sira hafoin vizita prizaun Bekora, Tersa (11/06).
Nia hatete, PNTL no instituisaun judisial sira sei esforsu hela hodi investiga kazu ne’e, no KFP rasik sei hala’o mós ninia knar tuir lei funsaun públika nian.
“Ha’u labele hatete iha ema na’in hira mak envolve iha kazu droga ne’e, ha’u seidauk bele hatete sai, maibé prosesu tomak iha hela ha’u-nia fatin, tanba nia ema funsionariu publika entaun prosesu ne’e agora ami halo hela, ha’u seidauk bele mensiona nominalmente.”
“Ha’u hatene (FP ne’ebé envolve) mai husi intituisaun ida ne’ebé, maibé ha’u seidauk bele esplika klaru ba imi jornalista sira,” dehan Antonio.
Tuir nia, iha lei funsaun publiku hatete bainhira funsionariu públiku ida fasilita transaksaun droga direita ka indireita sei hetan sansaun todan.
“Bainhira iha funsionariu balun fasilita transaksaun droga direita no (ka) indireita ultimamente desizaun ida ne’ebé todan mak iha rua: ida, suspensaun, no demisaun automatikamente nia la fila”.
