“Iha ita nia Estadu bainhira asina kontratu ho presu ne’ebé boot liu mak millaun lima. Ne’e duni, tenke iha buat ida vistu previu husi Tribunál Kontas, tanba ne’e Tribunál Kontas tenke asina embora Lei Tribunál Kontas nian rasik iha esesaun ida ka pengecualian,” dehan PM Rui, horisehik. 

Rui akresenta, buat ne’e urjente tebe-tebes. Tanba ne’e, governu bele avansa asina kontratu, depois mak husu autorizasaun husi kámara kontas. Maibé, kazu Hyundai ninian iha relasaun ho Suai Supply Base. Ne’e duni, projetu ne’e ho kustu totál tokon hitu-resin para atu konstrui buat ne’e hotu kedas. 

“Kámara kontas ita fó vistu previu, governu aprezenta prosesu hirak ne’e hotu, hahú husi konkursu to’o kontratu ne’ebé asina ona, aprezenta ba kámara kontas. Ne’e duni kámara kontas hanoin dehan katak, governu viola aprovizionamentu, governu hateten dehan lae, ami la viola, governu halo rekursu, bainhira Tribunál Kontas deside la fó vistu previu, governu halo rekursu hanesan mós kazu iha tribunál, kuandu tribunál deside dehan ema ida ne’e halo sala, nia iha direitu para atu halo rekursu, entaun Governu halo rekursu to’o agora tribunál kontas seidauk deside,” nia hatutan, 

Entretantu, nia realsa, sira iha tribunál dehan governu mak tenke rezolve kestaun ne’e, loos duni orsamentu atu kontratu ema iha governu, maibé sé mak atu deside para halo rekruta ba A, B ka C ne’e la’ós governu, tanba se lae governu interfere ona, tanba governu hakarak rekruta juis A, depois juis ne'e mai halo julgamentu nia tenke halo tuir governu ninia hakarak. 

Aleinde ne’e, nia dehan, kestaun kontabilidade jestaun osan ne'e iha Ministériu Justisa (MJ). Maibé atu deside ou selesiona ne’e tribunál. Ne’e duni, to’o agora tribunál seidauk book. Tanba ne’e kazu refere sei paradu hela iha ne’ebá.

Nia afirma, governu husu emprestimu husi Xina para atu melloramentu ba kanál irrigasaun Dili laran. Tanba sira halo publikasaun iha semana hirak liu ba hateten, Ministru Planeamentu Investimentu Estratéjia (MPIE), fó sala ba kámara kontas, tanba inundasaun iha Aeroportu Dili. 

Nia informa, fó sala tanba kanál irrigasaun foun atu bele responde ba inundasaun Aeroportu Dili ne’e tama iha projetu emprestimu ne'e. 

“Husi pontu vista Governu nian laiha regularidade, tribunál kontas argumenta dehan katak sala ne’e responde hotu ona. Maibé problema mak tribunál kontas seidauk konsege halo analiza ba ami nia rekursu,” salienta nia.

Nia dehan, Ministru kompetente presiza atu hadi'a. Ne’e duni husi perspetiva BoQ aprovizionamentu laiha problema, tanba Ministériu Justisa mós hein hela tribunál kontas atu prosesa buat ne’e. Maibé agora daudaun sira ko'alia para tinan ne’e ninia klaran sira atu dudu prosesu hirak ne’e.