“Ha'u preokupa ba kazu eis Ministra Madalena Hanjam tanba pena ne'ebé maka tribunál fó ne’e todan demais liu tanba nia Vise-Ministra Saúde la'ós Ministra," dehan Ramos Horta, iha Palasiu Prezidensiál, foin lalais ne'e. 

Tuir nia, Madalena nu'udar Vise-Ministra ne'ebé nia la simu osan ho kontratu. Nune'e kompañia mós la'ós ninian tanba ne'e sentensa tinan haat ne'e todan liu. 

Nia hateten, Madalena asina kontratu tanba simu orden husi Ministru no Primeiru Ministru. Tuir nia, kuandu ninia asinatura mak halo nia sala, loloos ne'e hetan pena suspensaun, la'ós prizaun efetivu. 

Kona-ba Emília, nia dehan, ne'e nu'udar dezafiu ba tribunál. Mezmu pena ne'e todan maibé tenke enfrenta hodi koopera ho justisa. 

“Uluk Tribunál fiar hodi fó nia sai tanba halo serbisu ba Estadu, maibé to’o ikus nia la fila ne’e afeta ba ita nia Estadu nia imajen,” tenik Horta.