Nia dehan, ho ida ne'e ME simu no sei asume responsabilidade tomak atu garante katak dokumentu fraternidade umana ne'ebé asina husi Grand Immam no Papa Francisco, dokumentu ne'e bele atu bele hatama iha kuríkulum iha ME ne'ebé oras ne'e iha faze halo revizaun ba kuríkulum terseiru siklu, nune'e mós ME hatama mós matéria fraternidade umana iha formasaun ba professor sira.

"Ohin dader ha'u iha enkontru ho Prezidente Repúblika ne'ebé mai atu simu orientasaun no husu Ministériu Edukasaun atu buka hahú prosesu desiminisaun ba dokumentu fraternidade umana ne'ebé hetan ona rezolusaun husi Parlamentu Nasionál. ME iha faze revizaun ba kuríkulum terseiru siklu signifika iha tinan ida ne'e nia laran hahú hatama iha kuríkulum maibé tanba prosesu hela ME sei servisu ho Gabinete ida Prezidensia Repúblika atu bele garante katak iha dokumentu ne'e simples nune'e profesór sira no estudante sira bele uza," informa ME Dulce de Jesus ba jornalista sira hafoin enkontru ho Prezidente Repúblika, iha Palasiu Prezidensiál Bairu-Pite, Sesta (09/01).

Tanba dokumentu fraternidade umana ne'e hanesan dokumentu ofisiál ida, nune'e ME hamutuk ho Gabinete Prezidensia Repúblika sei halo esforsu hotu-hotu atu simplifika dokumentu ne'e ho imajen ruma tan atu bele ajuda profesór no estudante sira bele utiliza.

Nune'e, dokumentu ne'e iha vantajen ba Timor Leste tanba ne'e Parlamentu Nasionál halo rezolusaun ida no hotu-hotu konkorda adopta dokumentu ne'e iha Timor Leste.

Molok ne'e, iha loron 12 Maiu 2022, Prezidente Repúblika José Ramos Horta, hasoru malu ho Prezidente Parlamentu Nasionál (PPN), Aniceto Guterres, hodi diskute progressu no prosesu kontinuasaun Parlamentu Nasionál nian ba atualizasaun dokumentu ne’e.