Ministra Edukasaun, Dulce de Jesus informa, tuir dadus, daudauk ne’e iha eskola 40 resin liu mak hasoru situasaun menus professor.

"Polítika ida ne'e Ministériu Edukasaun halo tuir kuadru pessoal ne'ebé halo tiha ona no iha eskola hamutuk 40 liu mak hasoru situasaun professor menus, tanba ne'e iha tempu badak sei halo transferénsia no halo kolokasaun iha bolsa ba kandidatu professor sira," informa Dulce ba jornalista sira hafoin enkontru ho Prezidente Repúblika, iha Palasiu Prezidensiál Bairu-Pite, Sesta (09/02).

Aleinde ne’e, nia hatutan, ME mós sei haree kona-ba reforma ba professor sira ne’ebé ho idade avansadu.

Tuir dadus, nia dehan, iha duni professor ne’ebé ho idade avansadu maibé sei kontinua hanorin.

“Tan ne’e Ministériu Edukasaun sei aprosima ho dalan ne'ebé di'ak liu atu parte hotu bele kontente no simu se karik sira tama ba reforma ka la'e,” dehan nia.

Ba ida ne’e, nia informa, iha semana ne’e hamutuk ho INSS sei halo planu no sei tuun hamutuk ba terenu hodi sosializa ba professor sira kona-ba sira ne'ebé tama ona idade reforma.

“Haree ba sira-nia idade, fízika, mentál, no buat sira ne'e hotu tanba tenke la'o dook tebtebes no balun mós susar tebtebes atu hamriik kleur, iha sala de aula oras haat ka lima, tanba rejime kareira dosente ezije atu professor ka mestri ida tenke halo servisu ka hanorin oras 24 iha semana ida,” dehan nia.