Vise-Primeiru Ministru (VPM), Ministru Kordenadór Asuntu Sosiais no Ministru Dezenvolvimentu Rural Habitasaun Komunitaria, Mariano Assanami Sabino hatete, Orsamentu Jerál Estadu 2024 ne'ebé mak aloka bá Ministériu Dezenvolvimentu Rural no Habitasaun sei konsentra de'it ba aldeia 70 no habitasaun nian sei harii uma 90 iha fatin-tolu.
“Prontu ne'e tempu seluk ita bele ko'alia ne'e bu'at lubuk ida, maibé atu dehan katak iha dezenvolvimentu rurais ita koloka bá 70 Aldeia ne'ebé atu hetan prográma ne'e, tanba orsamentu ne'ebé aprova ida-ne'e de'it, ba Habitasaun Komunitaria ita halo de'it uma 90, tanba orsamentu ne'ebé aprova ida-ne'e de'it,” Dehan Vise Primeiru Ministru, Assanami, hafoin akordu ho AHHA Education, iha Salaun Gabinete VPM Palásiu Governu, Sexta (09/02).
Vise-Primeiru Assanami informa, tan ne’e hanoin atu halo iha fatin-tolu ida iha Natarbora parte Munisipíu Manatutu, ida iha SP2 Welaluhu parte Munisipíu Manufahi no depois ida seluk mak Tunu Bibi parte Maliana.
“Depois mós sei halo apoiu sentina públiku ne'ebé la'os barak, maibé ita sei halo ida-ne'e no saida mak importante dezenvolvimentu rural ne'e la'os Ministériu sektorais,” Nia informa.
Assanami hatutan, la'ós hanesan saúde, edukasaun no Agrikultura, tanba ne’e dezenvolvimentu rural ne'e Ministériu bá rai no fatin, entaun entre urbana ho rurais, dezenvolvimentu hotu-hotu ne'ebé ke iha rurais ne'e tenke integradu.
Tanba hanesan baibain ko'alia ona katak tenke kordena, tenke sinkroniza, harmoniza atu ninia benefisiu prinsipál mak ne'e, povu tenke moris di'ak no moris di'ak ho integridade, sivilizasaun no demokrátiku.
“Tanba ida-ne'e mak objetivu ukun rasik-aan ni’an, ita depois tinan 20, Ministériu Dezenvolvimentu Rural mós mosu ne'e atu integradu, kordena atu dezenvolvimentu iha kraik ne'e bele la'o di'ak,” Nia afirma.
Nia reforsa, Ministériu ida ne'e mosu la'os atu foti fali setór ida ne’eba ka foti fali setór ida-ne'e, maibé lae, prográma hotu-hotu tenke iha kordenasaun, tanba iha Ministériu Dezenvolvimentu Rural iha kordenasaun Interministeriál setór hotu-hotu ne'ebé ba kraik ninia tarjet ne'e mak povu tenke moris di'ak.
Tanba ne’e, hanesan ko'alia bebeik ona katak povu iha rai ida-ne'e mak tenke hetan benefisiu, entaun tenke hamosu ona integridade povu ida-ne'e mak importante bá nasaun ida-ne'e.
Nia informa, Orsamentu tokon $13 itál ne'ebé mak koloka bá Dezenvolvimentu Rural ni’an no Habitasaun Komunitaria ne'ebé orsamentu ne'e limitadu tebes.
Maibé nia relata, iha tinan ida ne'e hatudu ninia servisu di'ak, bele tinan mai fali orsamentu bele aumenta, maibé dezenvolvimentu rural, la'os haree de'it nia osan, maibé dezenvolvimentu rural haree mós Ministériu sira seluk ne'ebé mak halo atividade iha kraik.
“Iha Programa Nasional Dezenvolvimentu Suku (PNDS), iha Ministériu seluk mós halo edukasaun rurais, Saúde rurais, no mós iha sosiál sira, Komersiu Indústria, bu'at hotu-hotu ne'ebé ke rurais ne'e ita hakarak tau matan para haforsa povu mós atu kontrola katak bu'at sira ba kraik ne'e la'o di'ak bá povu,” Nia aafirma.
