MJDK-MI Hahú Estuda Relatóriu Re-Fiskalizasaun Arte Marsiais Featured

By Domingos Gomes Fevereiru 13, 2024 640
Prezidente Komisaun Reguladora Arte Marsiais (KRAM), Octavio da Conceicão, hamutuk ho ekipa hasoru malu ho Ministru Interior, Francisco da Costa Guterres, Ph.D, no Ministru Juventude Desportu Arte no Kultura, Nelyo Isac Sarmento, hodi aprezenta relatóriu refiskalizasaun ba GAM (Grupu Arte Marsiais) PSHT, IKS no KORK nian hamutuk 993, hodi rekomenda ba Governu atu foti desizaun. (08/02/24). Foto:Media Servisu Relasaun Publikas. Prezidente Komisaun Reguladora Arte Marsiais (KRAM), Octavio da Conceicão, hamutuk ho ekipa hasoru malu ho Ministru Interior, Francisco da Costa Guterres, Ph.D, no Ministru Juventude Desportu Arte no Kultura, Nelyo Isac Sarmento, hodi aprezenta relatóriu refiskalizasaun ba GAM (Grupu Arte Marsiais) PSHT, IKS no KORK nian hamutuk 993, hodi rekomenda ba Governu atu foti desizaun. (08/02/24). Foto:Media Servisu Relasaun Publikas.

DILI: Ministeriu Joventude Desportu no Kultura (MJDK) ho Ministeriu Interior (MI), simu ona relatoriu re-fiskalizasaun ba grupu arte marsiais hodi halo analiza, molok aprezenta ba Konsellu Ministru atu foti desizaun.

Ministru Joventude Desportu no Kultura, Nelio Isac hateten, governu simu ona relatoriu husi Komite Reguladora Artes Marsiais (KRAM) kona ba re-fiskalizasaun grupu arte marsiais, tanba tuir rezolusaun governu suspende atividade arte marsias durante fulan neen (6).

Nia dehan, durante ne’e Komisaun Reguladora Artes Marsiais (KRAM), halo ona re-fiskalizasaun ba to’o iha sentru treinamentu arte marsias iha territóriu Nasionál hodi hatene kona-ba problema arte marsias nian.

“Ohin ami simu ona relatóriu re-fiskalizasaun ranting arte marsias ne’ebé existe iha TL, entaun tuir rezoluzaun ami ho Ministeriu Interior, sei hare hamutuk asuntu ne’e halo analiza klean liu tan hodi bele hato’o ba Primeiru-Ministru,  kona-ba problema arte marsias nian iha tempu sira tuir mai,” dehan Nelio ba jornalista sira hafoin remata enkontru ho Ministru Interior iha salaun MI villa verde (08/02).

Nia afirma, diskusaun  ba relatoriu ne’e sei kleur uitoan, tanba iha asuntu balun mak presija diskute hodi hatene kona-ba rekomendasaun lubuk ne’ebé mai husi KRAM.

“Rekomendasaun husi KRAM ne’e ha'u seidauk  haree detailu atu hateten sai ba ita boot media sira, tanba presija analiza di'ak liu tan kona-ba rekomendasaun ne’ebé iha, klaru katak rekomendasaun hirak ne‘e la halai ses husi atividade grupu arte marsias nian, liu liu kona-ba individu katak ema hirak ne‘ebé involve arte marsias, hare kona-ba organizasaun too iha sentru treinamentu," informa nia.

Tanba ne’e MJDK seidauk bele fó informasaun detailu, maibé públiku sei hatene bainhira  too faze tuir mai governu sei esplika, tanba sá maka governu halo desizaun hanesan ne’e no hanesan ne'ebá , tanba ne’e la'ós tuur hanoin foti desizaun.

“Atu reativa atividade arte marsias,  ha'u seidauk bele hatene depende ba organizasaun arte marsias sira nian rasik, bainhira iha prosesu ne’e halo di'ak sira nia atitude ne'e di'ak hotu, hanoin katak governu sei la bandu asosiasaun atu harii iha nasaun ne’e, tanba ne’e depende ba sira nia karakter organizasaun no mós sira nia atitude no individu sira ne'ebé sai membru iha organizasaun atu trata sira nia programa ba iha asuntu ne’e," subliña nia.

Iha fatin hanesan Ministru Interior, Francisco  Guterres reforsa, iha enkontru ida ohin ne'e MJDK ,KRAM, no PNTL hamutuk hodi halo diskusaun ida kle’an liu tan, tanba atu hamosu rezolusaun suspende atividade arte marsias, iha ne'ebá temi katak Ministériu rua mak sei konta halo,monitorizasaun, supervizaun kona-ba atividade hotu.

“Ami hasai despaixu konjuta ida hodi nune'e PNTL no KRAM atu bele ba hamutuk halo re-fiskalizasaun ba iha sentru treinamentu arte marsias sira nian, atu nune'e bele hatene loloos sira ne'e priénxe kritériu no la'o tuir duni buat ne’ebé iha ona ka lae? husi re-fiskalizasaun ranting arte marsias ne’e mak ohin KRAM lori nia rezultadu mai aprezenta ba ami atu haree hamutuk,” dehan nia.

Tanba ne’e relatóriu refere,  depois Ministériu rua sei hare  hodi hato'o ba Konsellu Ministru, saida loos mak presija atu tau iha ne'ebá hodi bele diskute no hare halo formula, ba arte marsias nia kontribuisaun ba estadu ne’e saida.

“Ita bele halo buat hotu, maibé ita kontribui ba dezenvolvimentu pas no seguransa ne’e mak importante, tanba ne’e ami seidauk bele adianta buat ruma, tanba relatóriu ne’e foin mak simu no hare presija diskute  halo kle’an,” hakotu nia.

Entretantu rezolusaun suspende atividade pratika grupu arte marsiais, durante fulan neen (6), sei remata iha fulan Abríl tinan ne’e, tanba ne’e Governu hahú ba oin, molok remata suspensaun tenke aprezenta ona relatóriu ba konsellu ministru atu tetu filaf ali, desizaun saida mak governu bele foti bazeia ba relatóriu ne’ebé komisaun reguladora arte marsiais halo.

Rate this item
(0 votes)

Independente Digital TV