15 Fevereiru, Sérgio Hornai simu posse ba MJ Featured

By Cristina Ximenes Fevereiru 13, 2024 882
Eis Komisariu Komisaun Anti Korrupsaun, Sergio Hornai. Foto:Dok/INDEPENDENTE. Eis Komisariu Komisaun Anti Korrupsaun, Sergio Hornai. Foto:Dok/INDEPENDENTE.

DILI: Hafoin besik fulan ida kargu Ministru Justisa mamuk, ikus mai Primeiru Ministru, Kay Rala Xanana Gusmão, deside hodi nomeia eis Komisariu Komisaun Anti Korrupsaun, Sergio Hornai, hodi asume kargu refere.

Primeiru Ministru, Kay Rala Xanana Gusmão, horseik, aprezenta naran Ministru Justisa foun ba Prezidente Repúblika.

Tuir planu, Sergio sei simu posse hodi asume pasta nu’udar Ministru Justisa, iha 15 Fevereiru ne’e.

"Naran ba Ministru Justisa foun ne'ebé governu hakerek mai Xefe Estadu aseita ona mak Sérgio Hornai," informa PM Xanana ba jornalista sira hafoin enkontru ho Prezidente Repúblika, José Ramos Horta, iha Palasiu Prezidensiál Bairu-Pite, Segunda (12/02).

Razaun hili Sérgio Hornai, Xefe governu ne’e dehan, tanba Sérgio Hornai iha esperensia iha seitor justisa.

"Ita agora, só depois tinan ida ne'e mak ita bele prova katak ita sai daudauk ona husi frazilidade tanba komesa kumpre daudauk ona halo programa, ezekuta ho di'ak. Ho justisa hakarak hadia iha institutusaun hotu-hotu tanba ne'e mak hili Sérgio Hornai atu lidera Ministériu Justisa," hatete nia.

Molok ne’e, tuir informasaun ne’ebé Jornal INDEPENDENTE asesu husi fonte importante ida katak, Primeiru Ministru deside ona hodi nomeia Sergio Hornai hodi okupa hikas kadeira Ministru Justisa ne’ebé daudauk ne’e mamuk hafoin Ministru sesante, Amandio de Sa Benevides, husik mundu ne’e.

“Xefe Governu hili Senhor Sergio nu’udar ema independente atu asume kargu Ministru Justisa,” informa fonte ne’ebé lakohi públika nia naran, Kuarta (07/02).

Enkuantu, tuir informasaun husi fonte ida iha palasiu Prezidensia Repúblika, parte governu haruka ona naran husi Ministru Justisa foun ba Prezidente Repúblika.

“Naran tama tiha ona, hein de’it prosesu atu simu posse,” informa fonte ne’e.

Enkuantu, Diretór Ezekutivu FONGTIL, Valentim da Costa Pinto hatete, PM mak iha kompetensia atu nomeia ema ne’ebé bele priense rekezitu, kompeténsia no esperénsia atu asume kargu ruma iha governu.

Ba figura husi Sergio, nia dehan, nu’udar eis Komisáriu KAK, ema ne’ebé estuda kona-ba lei, no sai mós hanesan defensor públiku, tan ne’e nia iha area ne’ebé loos kona-ba justisa ninian.

“Sergio Hornai, hanoin tanba nia ema ne’ebé estuda kona-ba lei, servisu iha area justisa ninian, ne’ebé ha’u hanoin karik ida ne’e la’os buat foun ba nia, importante mak see de’it ba kaer kargu, tanba hanesan ita hotu hatene hetan nomeiasaun hanesan kandidatu indepedente, importante mak bloku governu presiza tenke tau konfiansa polítika ne’e ba nia, atu nia bele halo nia kna’ar ho dia’k,” dehan nia.

Nune’e, nia hatutan, bele rezolve problema sira ne’ebé kontinua akontese iha Ministériu Justisa.

“Ami-nia esperansa hetan konfiansa ho indepedente primeiru tenke hetan konfiansa polítiku ho di’ak tenke apoiu nia atu nia halo nia planu, bele rezolve tutuir problema sira ne’ebé akontese iha Ministériu Justisa,” dehan nia.

Rate this item
(1 Vote)

Independente Digital TV