UNTL Hahú Halo Inskrisaun ba Estudante Tinan Akadémiku 2024 Featured

By Cesarina de Carvalho Fevereiru 13, 2024 71
Edifisiu UNTL. Foto:Google. Edifisiu UNTL. Foto:Google.

DILI: Universidade Nasionál Timor-Lorosae (UNTL) hahú ona inkrisaun ba estudante foun ba anu letivu 2024, iha resintu Fakuldade Ekonomia no Jestaun.

Vise-Reitór Asuntu Akadémiku UNTL, Samuel Venançio Freitas hateten, iha loron 3 Fulan-Fevereiru tinan ne'e anúnsiu rezultadu ba estudante sira ne'ebé asesu iha UNTL, hahú ohin (12/02) estudante sira halo inskrisaun to’o iha loron 23 fulan ne’e.

"Tuir kalendáriu ne'e ita rejista estudante foun iha loron 19, maibé tanba sira servisu lalais no anúnsia rezultadu ne'e sedu liu entaun ita mós dada tiha data inskrisaun ne’e mai tiha iha loron 12, tanba ne’e, ohin sira hahú ona rejistu depois sei to’o iha 23 de Fevereiro," Dehan Vise-Reitór iha nia knaar fatin, Kampus Sentral UNTL, Segunda (12/02).

Nia hatutan, bainhira inkrisaun ne'e remata sei kontinua kedas preparasaun ba orientasaun akadémika (Ordik).

Estudante foun sira ne'e iha hotu ona formuláriu ba selu propinas, tanba ne’e sira selu de’it iha Banku Nasionál Komérsiu Timor-Leste ne’ebé lokaliza iha UNTL, maibé sira mós bele ba rejistu iha Sukursál sira seluk ne'ebé iha teritoriu tomak hodi fasilita estudante sira ho lalais.

"Ba alunus foun sira, kuandu foti ona formuláriu atu selu propinas ne'e kompletu no estudante sira ne’e la’os selu de’it iha BNCTL iha UNTL ne’e, maibé bele ba selu mós iha sukursál sira seluk, no bele mós ba munisípiu tanba iha munisípiu mós iha BNCTL," nia informa.

Nia hatutan, tenke ba iha sukursál seluk atu bele lalais, tanba dala barak selu hotu iha BNCTL ida iha UNTL nia ne'e sempre problema no tarde tanba estudante barak.

Nia dehan, estudante sira presiza selu uluk propinas no iha tiha resibu foin bele foti Fixa Planu Estudu (KRS), nune'e bele hetan númeru rejistu estudante (NRE) hodi bele ba hahú orientasaun no prosesu aprendisajen.

Tuir planu orientasaun akadémika nian ne'e sei hahú iha loron 7 to’o 9 fulan-Marsu, maibé ne'e depende ba rejistrasaun hotu sedu.

"Molok ba aula tenke hahú ba ordik, ne'ebé ita-nia orientasaun akadémiku ne'e ita  planeia ba iha loron 7- 9 fulan-Marsu nian, mais se ida ne'e rejistu sedu, haree ba ema hotu rejistu ona no tama hotu ona, no ita sei konfirma balun ba ona fatin seluk karik maske sira-nia naran publika ona iha jornál repúblika, hafoin ita planu fali ba ordik, no dadaun ita foka oinsá mak rejistu ne'e la'o diak, tanba kada tinan, rejistu sempre mosu  problema, ho ida ne'e mak ami-nia senadu no estudante mos sei akompaña ajuda sira fahe formuláriu atu selu iha Banku. Atu nune'e  ema labele hobur no se mak hetan ona  formuláriu bele ba selu ona,"nia dehan.

Estudante sira ne'ebé naran publika ona iha jornál repúblika, ba tinan 2024, sei labele halo transferénsia tanba prosesu aprendizajen seidauk la'o.

"Ba estudante sira ne'ebe mak hakarak atu transferénsia tenke  liu husi dalan, tanba agora seidauk bele halo transferénsia ho razaun seidauk eskola, no  seidauk tinan ida oinsá mak bele transferensia uluk ona, ne'ebé ita tenke tuir regra, katak tinan tuir mai mak bele  halo fali pedidu entre fakuldade atu bele halo transferénsia se karik fakuldade seluk aseita," nia hato'o.

Kandidatu ne'ebé asesu ba institutu públiku rua hanesan UNTL no Institutu Politékniku Betano (IPB) ba tinan Akadémika 2024 hamutuk 5.236, ne'ebé kompostu husi UNTL 4.774 no IPB 462.

Rate this item
(0 votes)
Last modified on Sexta, 16 Fevereiru 2024 17:48

Independente Digital TV