Deputadu bankada FRETILIN, Antonino Bianco hateten, normalmente VPM Kalbuadi auzensia ne'e Primeiru Ministru, Xanana Gusmão, mak hatene parese moras ka auzénsia ba buat seluk.
Nia dehan, VPM bele ba rai-li'ur maibé ninian posizaun ne'e nunka muda, ema bele ba fatin-fatin maibé funsaun servisu nunka atu muda nafatin funsiona, labele abandona to'o fali fulan rua nia laran.
"Agora iha prátika nia la intende, entaun nia ba fatin seluk, entaun dehan posizaun no servisu ne'e muda hotu ba nia fatin, entaun ema ne'ebe ukun la intende oinsá hala'o knaar. See prátika mak fulan rua servisu la la'o entaun ida asume pasta VPM no Ministru Koordenador Asunto Ekonomika la intende nia servisu. Nia bele moras maibé funsaun nunka moras no servisu nunka moras", dehan nia, iha Parlamentu Nasionál, Sesta (9/2).
Servisu la funsiona fulan rua, Bianco hatutan, see hanesan ne'e VPM no Ministru Koordenadór Asuntu Ekonómiku prátika erru ida mak ne'e, tanba kuandu nia ba rai-li'ur, maibé tuir loloos ninia funsaun ne'e labele sees hosi Timor-Leste.
Nia mós kestiona, see membru governu ne'e la intende saida mak halo, nia konsekuénsia mak ne'e atividade la la'o tanba ema sira ne'ebé servisu iha nia fatin no iha instuisaun públiku no empreza públika la hatene saida mak atu halo tanba laiha orientasaun.
"Ba ema hotu ne'ebe hili membru governu atu servi instituisaun tanba nia asume posizaun barabarak maibé servisu la la'o no abandona permenente servisu, tanba ema sira servisu iha laran la hatene atu halo saida, tanba la hetan orientasaun hosi nia", katak nia.
Nia nota mos katak, durante ne'e Primeiru Ministru, Xanana Gusmão, mós la fó orientasaun no sira ne'ebe besik Kalbuadi la hatene oinsá mak akonsela nia hasai desizaun oinsá instituisaun IP no EP sira funsiona nafatin.
"Ema ne'e (Kalbuadi) laiha responsavel, so iha oportunidade okupa fatin, maibé laiha responsavel atu hala'o funsaun ba pasta tolu ne'e nia asume hanesan, Vise Primeiru Ministru no Ministru Koordenadór Asuntu Ekonómiku no Ministru Turizmu no Ambiente", nia preokupa.
Nia dehan, tanba nia laiha sentidu responsavel, tanba ne'e nia husu mós Primeiru Ministru atu halo avaliasaun ba nia, tanba nia iha oportunidade okupa fatin barabarak maibé laiha responsavel.
Iha fatin hanesan, Vise Prezidente Bankada CNRT, Patrocino Fernandes hateten, públiku persiza buka hatene ona tanba saida mak Vise Primeiru Ministru no Ministru Koordenadór Asuntu Ekonómiku auzensia hela servisu, maibé konsidera preokupasaun hosi públiku normál katak, instituisaun IP no EP la funsiona.
"Ita-nia VPM Asuntu Ekonómiku ninia auzensia servisu ne'e, razaun tanba halo tratamentu saude iha rai-li'ur, tanba nia iha kondisaun persiza halo tratamentu, maibé kona-ba servisu la'o nafatin, tanba diresaun sira kontinua servisu," katak nia.
Molok ne'e, Vise Ministru Asuntu Parlamentár Adérito Hugo da Costa hatete, Vise Primeiru Ministru koordenadór Asuntu Ekonómiku No Ministru Turizmu no Ambiente iha hela kondisaun saúde, tratamentu hela ninia saúde seidauk fila.
"Maibé hanesan baibain kargu temporariu produsaun ne'e lidera hela husi Ministru Transporte Komunikasaun, Miguel Marques Manetelo, mak durante halo hela serbisu enkaregadu," dehan nia.
Adérito dehan, nia halo hela tratamentu iha rai-li'ur tanba nia moras, espera nia rekupera tempu badak sei fila-fali mai halo serbisu hanesan baibain iha ministériu ne'e.
Maibé hanesan baibain kargu temporia ba interinu ne'e lidera hela husi Ministru Transporte Komunisaun maka hanesan Interinu. Durante halo hela servisu sira liga ministru koordenadór asuntu ekonomia no ministru turizmu ambiente.
Entretantu Francisco Kalbuadi Lay la halo servisu hetan moras, agora halo tratamentu espera katak iha tempu badak nia kondisaun saúde rekupera hodi mai halao fali nia servisu.
Tuir informasaun katak Vise Primeiru Ministru no Ministru Koordenadór Asuntu Ekonómiku, Francisco Calbuadi Lay, tratamentu kondisaun saúde iha Austrália.
