Komandante F-FDTL Lere haktuir preokupasaun Presidente Repúblika Fransisco Guterres Lú Olo, ba jornalista sira, hafoin halo sorumutu ho Xefe Estadu, iha Palacio Presidensiál, Bairo-Pitte, Dili, kuarta ohin.
Lere haktuir katak, Prezidente Repúblika alerta instituisaun seguransa atu halo atuasaun tuir Dekretu Governu kona-ba medidas estadu emerjénsia, ne’ebé aprova iha Konsellu Ministru iha 28 marsu 2020.
Tanba ne’e, tuir nia katak Komandu F-FDTL no PNTL sei tuur hamutuk atu haree atuasaun iha terrenu.
Seguransa iha fronteira terrestres ne’ebé luan tebes ho falta rekursu no meius ba kontrolu sai preokupasaun F-FDTL ninian. Tanba ne’e, Xefe Estadu Maior Jenerál husu kontribuisaun husi komunidade no autoridade lokál atu hamutuk tau matan ba seguransa liuhusi kontrolu ema no tama no sai iha area fronteira terrestre ninian.
